МВР: Перпарим Бајрами приведен и спроведен во затворот во Шутка
Бајрами, првоосомничен во случајот „Државна лотарија“, се пријави за влез во земјата и е лишен од слобода.
Министерството за внатрешни работи потврди дека Перпарим Бајрами е лишен од слобода и спроведен во Казнено поправната установа Затвор Скопје – Шуто Оризари, откако утринава се врати во земјата.
Од МВР појаснуваат дека Бајрами, кој речиси две години беше во бегство, утринава во 05:35 часот се пријавил на граничниот премин Долно Блаце.
Обвиненијата и меѓународната потерница
Во соопштението на Министерството стои: "Денеска (09.09.2026) во 05:35 часот на ГП ’Долно Блаце’ за влез во РСМ се пријави Перпарим Бајрами (33), баран со меѓународна потерница по наредба од ОЈО Скопје бр.XVII KO бр.4232/24 од 17.12.2024 година. Лицето е лишено од слобода и спроведено во Казнено поправната установа Затвор Скопје".
Бајрами е првоосомничен во предметот „Државна лотарија“; јавните обвинители го товарат за проневера и злоупотреба на службената положба. Во обвинението се наведува дека заедно со поранешниот прв вицепремиер и висок функционер на Демократската унија за интеграција, Артан Груби, се вмешани во злоупотреби вредни 8,2 милиони евра.
Покрај Бајрами и Груби, како обвинети се наведени и поранешниот генерален секретар на Владата Методија Димовски и членовите на Надзорниот одбор на Државна лотарија: Скендер Мехмети, Бојан Јанев, Фатмир Рамадановски, Александар Димитриоски и Башким Авдиу.
Артан Груби претходно, во февруари годинава, сам се пријави на косовско‑македонската граница при влез во земјава и беше веднаш приведен. Обвинителниот предлог ги товари сите за злоупотреба на службената положба и овластување во врска со противзаконска набавка на видеолотариски терминали за приредување електронски игри на среќа.
Фото: прес-материјал од настанот
