МЖСПП ја објави иницијативата „Зелен пресврт низ дигитализација“: пет модули за мониторинг и мапирање

Министерството за животна средина и просторно планирање ја презентираше иницијативата „Зелен пресврт низ дигитализација“ — пакет од пет дигитални модули чија цел е поголема транспарентност, побрзи административни услуги и поефикасно управување со еколошките податоци, рече министерот Мухамет Хоџа на прес-конференција.

Како што рече Хоџа: "Дигитализацијата за нас не е само софтвер. Таа е политичка алатка за правда и сурова транспарентност. Каде што има дигитален систем, нема простор за криење и тука завршува неефикасноста на системот".

Пет модули, конкретни активности

Иницијативата е организирана во пет модули, секој посветен на конкретна област. Првиот модул „Темели“ ќе овозможи јавен увид во проектите на министерството — нивната вредност, локација, извори на финансирање и рокови за изведба — за да можат граѓаните, медиумите и НВО да ги следат.

Модулот „Јадро“ ги опфаќа дигитализацијата на архивата и електронското следење на предметите, во соработка со Министерството за дигитална трансформација; Хоџа посочи дека веќе е завршена дигитализацијата на просторно-информативниот систем за геопросторните податоци за заштитените подрачја.

Во рамките на модулот „Време“ се планира административна реформа за скратување на постапките — првата фаза опфаќа 15 од предвидените 30 чекори и треба да заврши до крајот на годината. Модулот „Земја“ предвидува дигитално мапирање на дивите депонии во општините за подобро планирање на ресурсите за нивно расчистување и подготовка за регионалните центри за отпад; функционалноста на платформата ќе биде предмет на консултации со граѓанските организации, ЗЕЛС и стручната јавност, а реализацијата е предвидена во буџетот за 2027 година. Паралелно, во неколку општини се спроведува пилот-проект за видеонадзор на дивите депонии.

Последниот модул „Воздух" предвидува воспоставување дигитален регистар во кој 140 иматели на А-интегрирани еколошки дозволи ќе објавуваат податоци за своите емисии, согласно Законот за контрола на емисиите што стапува во сила во септември 2027 година.

На прашање за претстојната грејна сезона, Хоџа информира дека Владата на вчерашната седница усвоила краткорочен план со конкретни мерки за институциите — вклучувајќи засилени контроли на индустриските капацитети со А- и Б-интегрирани дозволи и тесна соработка со локалната самоуправа. Во насока на долгорочни мерки, министерството спроведува проект за замена на нееколошките системи за греење во јавните установи: во проектот се предвидени над 70 институции, за 20 институции веќе е завршено, а другите се во подготовка на документацијата.

Хоџа најави дека во наредниот период поединечно и детално ќе бидат презентирани сите пет модули пред јавноста.

Фото: прес-материјал од настанот