Над 67 милиони млади без работа во 2025, МОТ предупредува дека вештачката интелигенција може да избрише милиони работни места

Светската невработеност меѓу младите се зголеми повторно во 2025 година, покажува извештајот на Меѓународната организација на трудот (МОТ): стапката кај возрасната група од 15 до 24 години достигнала 12,4 проценти, што одговара на околу 67 милиони млади луѓе без работа.

Во документот "Global Employment Trends for Youth 2026" МОТ оцени дека влошувањето следело по период на закрепнување на пазарот на труд по пандемијата и дека на состојбата влијаат побавниот економски раст, геополитичките тензии и слабата способност за креирање нови работни места, кои заедно ја отежнуваат интеграцијата на младите на пазарот на труд.

Извештајот укажува и на поширок проблем: повеќе од 257 милиони млади — околу една петтина од младата популација во светот — не се ниту вработени, ниту во образование или обука (категорија позната како NEET).

Вештачката интелигенција како дополнителен ризик

МОТ предупредува дека вештачката интелигенција може да донесе дополнителен притисок, особено врз работните места со средно ниво на квалификации кои често се главната влезна точка за младите. Според анализата, околу 6,1 процент од работните места кои ги извршуваат младите се високо изложени на влијанието на вештачката интелигенција.

Ако автоматизацијата доведе до губење само 10 проценти од овие високо изложени работни позиции, наведува извештајот, би можеле да исчезнат до 5,6 милиони работни места, при што ефектите би биле особено видливи во побогатите економии.

Регионално, највисоки стапки на младинска невработеност се регистрирани во арапските држави и Северна Африка, додека состојбата се влошува и во делови од Европа и Северна Америка. Во посиромашните земји многу млади се принудени да работат во неформалниот сектор и во несигурни услови поради недостаток на формални можности.

Извештајот заклучува дека пазарот на труд се менува брзо и дека создавањето квалитетни работни места за младите ќе остане еден од клучните економски предизвици во наредниот период.

Фото: Профимедиа