Над 80 невладини организации се претставија на „Ден на граѓански организации“ во Скопје

Повеќе од 80 невладини организации од целата земја денеска ги претставија своите активности на фестивалот „Ден на граѓански организации“ во Градскиот парк во Скопје, организиран од швајцарската програма за поддршка на граѓанското општество Цивика мобилитас. Настанот се одржа кај фонтаната „Лотос“ од 11 до 15 часот.

Програма, работилници и активности

Шестото издание на фестивалот оваа година обедини близу 80 организации на граѓанското општество, истакна Александар Кржаловски, директор на МЦМС, во своето обраќање. Програмата почна во 11 часот со настап на млади од Тетово наречен „Гласот во акција – фестивал на младите што создаваат“ и вклучуваше проекција на документарецот „Универзитетите на раскрсница: реформите, автономијата и иднината“. Паралелно се одржаа работилници за афазија, намалување на агресивното однесување кај децата, садење растенија и училишни градини.

На штандовите и во посебни шатори посетителите имаа можност да учествуваат на обуки за законодавно застапување, работилници за изработка на детски накит и модни додатоци, експерименти за преработка на био-отпад, бесплатен час за дигитално образование и за опасностите од користењето на дигиталните технологии, видео презентација за животот во ромските населби и кратка обука за шминкање.

Животната средина и енергетските теми беа застапени преку презентации и квизови, при што учесниците добија практични информации за сончева енергија, обновливи извори, фотонапонски системи и можности домаќинствата сами да произведуваат електрична енергија. Дел од организациите посветија активности на здравјето — понудија тестирање за ХИВ, тестови за самотестирање и тестови за бременост, а беа организирани и едукативни игри за деца и советувања за родителите.

„Овој фестивал е прослава на граѓанскиот активизам и неговиот придонес за општеството и за граѓаните, и сакам да им се заблагодарам и да им искажам признание на организаторите“, рекол амбасадорот на Швајцарија во земјава, Кристоф, Сомер, на официјалното отворање.

„Ова е добар момент ние, како граѓани, да се потсетиме на клучната улога на активното и живо граѓанско општество за нашите демократии. Во тој дух, особено сум среќен што гледам сè поголем број посетители, граѓани заинтересирани за работата на организациите на граѓанското општество. Повторното поврзување на организациите со граѓаните, помагањето да ги консолидираат своите заедници и зголемувањето на довербата на граѓаните во организациите на граѓанското општество се важни цели на Цивика мобилитас и клучни предизвици во овие времиња“, рекол тој.

„Затоа ги поканувам сите да ги посетат штандовите, да разговараат со организациите и да се уверат колку многу може да направи граѓанското општество кога е поврзано со граѓаните“, додаде Кржаловски.

Фото: прес-материјал од настанот