Најсмртоносната епидемија на ебола во историјата на ДР Конго — најмалку 2.325 загинати

Епидемијата на ебола во Демократска Република Конго стана најсмртоносната во историјата на земјата: владините податоци покажуваат дека досега починале најмалку 2.325 лица.

Вкупно се потврдени 4.945 случаи, од кои 101 биле регистрирани во претходните 24 часа. Заразата се проширила во шест од вкупно 26 провинции, главно низ областите долж североисточната граница; во провинцијата Итури се пријавени повеќе од 3.400 случаи — таму е и првичното жариште.

Вирусот бундибуџо и отсуство на одобрена вакцина

Здравствените власти предупредуваат дека ова е епидемијата на ебола со најбрзо ширење во познатата историја на вирусот. За сегашниот нагол пораст се смета дека е одговорен редок вид — вирусот бундибуџо — за кој нема одобрена вакцина ниту терапија.

Томас Париш, специјалист за јавно здравје кој неодамна бил испратен во ДР Конго како дел од тимот на „Лекари без граници“, изјави: "Вообичаено, како што напредува епидемијата, стапката на смртност меѓу заболените треба да се намалува, бидејќи се подобрува следењето на контактите, а пациентите се откриваат и се лекуваат порано. Наместо тоа, сè уште откриваме многу случаи во многу доцна фаза, кога е помала веројатноста лекувањето да биде успешно. Многумина се евидентираат дури откако ќе починат во своите заедници ."

Обединетите нации предупредија дека „еболата победува во Демократска Република Конго“ и дека епидемијата сега одзема приближно по еден живот на секои 30 минути. Уганда пријавила најмалку 20 случаи, сите во главниот град Кампала. Во мај, Светската здравствена организација прогласи дека епидемиите во ДР Конго и Уганда претставуваат вонредна состојба во јавното здравје од меѓународно значење.

Според објаснувањата на СЗО, вирусот преминува од диви животни на луѓето, а потоа се шири меѓу населението преку директен контакт со крвта, секретите, органите или другите телесни течности на заразените, како и преку контаминирани површини и предмети, вклучувајќи постелнина и облека. Симптомите може да почнат со треска, замор, малаксаност, болки во мускулите, главоболка и болки во грлото, а потоа да се појават повраќање, дијареја, болки во стомакот, осип и симптоми на нарушена функција на бубрезите и црниот дроб.

Има и протести во Конго: здравствените работници кои се борат со еболата тврдат дека не добиваат плати со месеци.

Фото: EPA