Наргес Мохамади опишала злоставување во своите мемоари

Нобеловката за мир, Наргес Мохамади, во своите нови мемоари опишува искуства од години поминати во ирански затвори, вклучително тврдења за физичко насилство, самица и ограничена медицинска нега.

Во интервју за Си-ен-ен таа рече дека делови од книгата „Жената никогаш не престанува да се бори“ ги напишала додека била зад решетки и дека нејзини пријатели и други затворенички ѝ помогнале да ги прокриумчарат страниците надвор од притворот.

Тврдења за повреди и долги периоди во изолација

Мохамади наведува дека за време на нејзиниот последен притвор, кој траел од декември до мај, безбедносните сили ѝ нанеле физички повреди, вклучувајќи тепања со дрвени палки и стапови, и дека поминала два месеци во самица без контакт со семејството или адвокатите.

Норвешкиот Нобелов комитет претходно објави дека добил „веродостојни извештаи“ за суровиот третман кој ѝ бил применет за време на тој притвор. Фондацијата на Мохамади соопшти дека таа доживеала здравствена криза во март, изгубила околу 20 килограми и подоцна поминала 18 дена во болница. Во мај таа била привремено ослободена поради здравствени причини и, како што вели, и натаму се лекува.

Иранските власти и официјалните медиуми ги минимизираа обвинувањата за злоставување, додека меѓународни организации и поединци изразија загриженост за нејзината состојба. Мохамади е една од најпознатите активистки за човекови права во Иран и, како што е наведено, е осудена на вкупно повеќе од 44 години затвор и 154 камшикувања во текот на годините.

За цената на својот ангажман Мохамади рече: "Да можев да се вратам во моментот кога ја започнав мојата борба, дури и да знаев што ќе ми се случи, дефинитивно би ја донела истата одлука". Таа, исто така, зборуваше за дилемата поврзана со нејзините деца, близнаците Али и Кијана, кои живеат во Франција: "Дали навистина имав право да им го одземам многу обичниот живот, да ја имаат нивната мајка со нив? Тоа е тешко прашање и не можам да одговорам со сигурност."

Фото: прес-материјал од настанот