Avokati i Popullit: Asnjë fëmijë të mos mbahet jashtë arsimit

Avokati i Popullit, me rastin e fillimit të vitit shkollor, apeloi që asnjë fëmijë në Maqedoninë e Veriut të mos harrohet, neglizhohet apo të lihet i vetëm në realizimin e të drejtës për arsim.

Sipas mesazhit zyrtar, arsimi duhet të jetë jo vetëm i garantuar formalish, por i vërtetë, i qasshëm dhe me cilësi për çdo fëmijë. "Asnjë fëmijë nuk duhet të harrohet, neglizhohet apo të lihet i vetëm," theksoi Avokati i Popullit, duke nënvizuar përgjegjësinë e përbashkët për krijimin e kushteve që kjo e drejtë të realizohet.

Nevojat praktike dhe grupet në rrezik

Avokati i Popullit vuri në dukje se për një fëmijë shkolla është afër, ndërsa për një tjetër kërkon udhëtim; për disa familje sigurimi i materialeve shkollore është i thjeshtë, për disa të tjera është një barrë e rëndë financiare. Arsimi falas duhet të nënkuptojë heqjen e pengesave në mënyrë që çdo fëmijë të mund të ndjekë mësimin pa ndërprerje dhe të përparojë.

Si masa konkrete përmenden sigurimi i për kohshëm i teksteve dhe materialeve, transport falas dhe i qasshëm për fëmijët që kanë të drejtë, mjedise shkollore të sigurta dhe të aksesueshme dhe mbështetje adekuate për fëmijët dhe familjet në nevojë. Duhet kushtuar vëmendje të veçantë fëmijëve në rrezik social, fëmijëve me aftësi të kufizuara, atyre në zona rurale dhe të largëta dhe nxënësve me rrezik të mungesave.

Zyra po ashtu kërkoi parandalim dhe identifikim në kohë të dhunës nga bashkëmoshatarët. "Dhuna midis bashkëmoshatarëve, qoftë në klasë, në oborrin e shkollës apo në hapësirën dixhitale, nuk duhet të injorohet apo të justifikohet si "punë fëminore"," u tha, duke kërkuar që çdo rast i raportuar të trajtohet seriozisht dhe të shoqërohet me reagim dhe mbështetje të përshtatshme, duke u bazuar kryesisht në interesin më të mirë të fëmijës.

Avokati i Popullit i bëri thirrje institucioneve kompetente, njësive të pushtetit lokal dhe shkollave të vazhdojnë punën për të siguruar që asnjë fëmijë të mos përjashtohet nga procesi arsimor për shkak të varfërisë, largësisë, aftësisë së kufizuar, dhunës apo ndonjë rrethane tjetër. Prindërit, mësuesit dhe shërbimet profesionale u inkurajuan të bisedojnë me fëmijët, t’i dëgjojnë dhe t’i nxisin të flasin hapur për problemet dhe sfidat; nxënësit përfaqësues duhet të promovohen si mekanizëm për pjesëmarrje aktive në mbrojtjen e të drejtave të tyre.

Avokati i Popullit mbetet i hapur për çdo fëmijë, prind ose qytetar që vlerëson se e drejta e një fëmije është shkelur ose se realizimi i të drejtave është penguar. Telefon: 02 3129 335. E-mail: contact@ombudsman.mk.

Foto: material shtypi nga ngjarja