Banka Kombëtare mori akses në linjën e Eurosistemit prej 50 miliardë eurosh

Banka Kombëtare e Republikës së Maqedonisë së Veriut ka marrë miratimin e Bankës Qendrore Evropiane për t'u lidhur me linjën e zgjeruar të repo-s së Eurosistemit (EUREP) me një kapacitet maksimal prej 50 miliardë eurosh. Pas përfundimit të procedurave teknike të bashkimit, banka qendrore do të ketë akses të shpejtë në likuiditet në euro për t'iu përgjigjur goditjeve të mundshme financiare dhe një kërkese të rritur për likuiditet në euro.

Miratimi i këtij instrumenti synon të forcojë rezistencën e sistemit financiar, edhe pse rezervat e huaja të Bankës Kombëtare janë në nivele të larta dhe mbeten mbrojtja kryesore për qëndrueshmërinë makroekonomike dhe financiare.

Si ndryshon nga linja e repo-s gjatë pandemisë

Derisa më parë Banka Kombëtare kishte akses në një linjë repo me kufi prej 400 milionë eurosh, një instrument i vendosur gjatë pandemisë COVID-19 dhe që së fundi u zgjat deri më 31 janar 2027. Linja e zgjeruar e repo-s (EUREP) është një instrument i përhershëm i Eurosistemit, me kapacitet shumë më të madh dhe një gamë më të gjerë, duke përforcuar rrjetin mbrojtës për likuiditetin në euro në raste të tronditjeve të tregut.

EUREP është krijuar për të mbështetur zbatimin e pandërprerë të politikës monetare. Ajo siguron akses të vazhdueshëm në likuiditet në euro për bankat qendrore dhe autoritetet monetare jashtë zonës së euros dhe menaxhohet nga pesë banka kombëtare nën koordinimin e BQE-së.

Me lejen për t'u lidhur me EUREP, BQE konfirmon angazhimin e saj për sigurimin e likuiditetit në euro për bankat qendrore jashtë zonës së euros gjatë periudhave të sfidave të tregut dhe për mbështetjen e funksionimit të rregullt të tregjeve financiare.

Foto: material shtypi nga ngjarja