Protesta të dhunshme në Itali, përplasje më të rënda në Milano
Të maskuar hodhën piroteknikë në drejtim të policisë në sheshin Duomo; të paktën 4 policë dhe 20 protestues të lënduar, mbi 50 të arrestuar.
Protestat kundër rritjes së shpenzimeve të jetesës në Itali u përshkallëzuan në dhunë, me përplasje më të rënda në Milano ku të rinj të maskuar, veshur me të zeza, hodhën piroteknikë ndaj policisë në sheshin Duomo dhe ngritën barricada.
Përhapja e përleshjeve dhe arrestimet
Policia në Milano u tërhoq fillimisht dhe priti forca shtesë pasi grupi synoi oficerët me fishekzjarre dhe sende të tjera. Të paktën 4 policë dhe 20 protestues u lënduan në qytet. Mbi 50 persona u arrestuan, gjysma e tyre të mitur.
Përplasje të ngjashme ku demonstruesit hodhën gurë dhe piroteknikë ndaj policisë u raportuan edhe në Torino, Bologna dhe Bergamo.
Kryeministrja Giorgia Meloni e dënoi dhunën. Kryebashkiaku i majtë i Milanos, Giuseppe Sala, gjithashtu e dënoi trazirën, por shfaqi edhe mirëkuptim për pakënaqësitë e qytetarëve.
"Arsyet e protestës ishin të kuptueshme. Por, dhuna ndaj policisë dhe dëmet e mëdha të shkaktuara në qytet nuk mund të justifikohen," deklaroi Sala.
Shkaku i protestave lidhet me zemërimin ndaj inflacionit, çmimeve të larta të karburantit dhe krizës së theksuar të banesave në qytetet e mëdha, që godet veçanërisht familjet me të ardhura të ulëta dhe të mesme.
Foto: Printskrin
