Нема договор на Европскиот совет за новиот буџет и за финансирањето на Украина

Дводневниот Европски совет во Брисел заврши без договор за новата Повеќегодишна финансиска рамка и без согласност за пакетот средства наменет за Украина, додека миграцијата го исфрли прашањето за проширувањето од фокусот на дебатата.

Лидерите договорија преговорите за буџетот да продолжат во следните недели под водство на претседателот на Советот Коста, но ниту една од земјите-членки не очекува конечен договор до крајот на годината. "За да постигнеме договор мораме да ги задржиме националните придонеси на разумно ниво, додека во исто време ги зачуваме нашите амбиции да ги испорачиме заедничките приоритети. За тоа да биде можно, од основна важност е да ја консолидираме работата врз новите сопствени ресурси," порача Коста.

Миграцијата ја превзеде агендата

Миграцијата, како една од најактуелните теми, беше доминантна и покрај тоа што речиси сите членки пријавуваат пад на бројот на нелегални пристигнувања, а некои бележат историски ниски бројки; настани како оној во Сеута, сепак, ги загрижуваат главните градови во ЕУ. "Токму затоа, ние како Комисија ќе предложиме нова Европска рамка за итни случаи. Таа ќе ги обезбеди неопходните средства земјите членки брзо да одговорат на сериозни закани на нашите надворешни граници и да ја зачуваат нашата интерна безбедност," рече претседателката на ЕК, Урсула фон дер Лајен.

Продолжувањето на поддршката за Украина и вложувањето во заедничката безбедност беа дел од дискусиите, но не беше постигнат договор за испораката на неопходните за украинскиот буџет 70 милијарди евра за следната година.

Дискусијата за проширување беше помалку забележлива поради хрватските забелешки околу пристапувањето на Црна Гора; барањата на Загреб беа прифатени, а Пленковиќ тврди дека неговата земја била далеку поконструктивна од некои други членки, суптилно alудирајќи на случајот со Македонија. Во заклучоците изостана спомнување на останатите земји кандидатки, освен повторувањето на порака дека проширувањето е геостратешка инвестиција во мирот, стабилноста и просперитетот на Европа.

Работата околу буџетот и останатите нерешени прашања ќе продолжи во следните недели додека лидерите се обидуваат да најдат компромиси пред зацртаните рокови до крајот на годината.

Фото: прес-материјал од настанот