Нетанјаху победи, но нема мнозинство — арапските партии можат да бидат клучни

Коалицијата на премиерот Бенјамин Нетанјаху освои 53 од вкупно 120 места во Кнесетот, според конечните резултати што беа објавени синоќа. Партијата Ликуд е најголема со 27 пратенички места, додека опозицискиот блок предводен од центристот Гади Ајзенкот освои 48 места. Двете арапски листи, Раам и Обединетата листа, заедно освоија 19 места и се појавуваат како можен клучен фактор при формирањето на новата влада.

Недостатокот на апсолутно мнозинство ќе го отежне процесот на преговори и може да ги продолжи разговoрите со недели. Доколку партиите не успеат да формираат стабилна коалиција, постои можност за распишување нови избори.

Блокот на Нетанјаху ги обвини арапските партии за изборни измами и за наводно добивање средства од Катар за купување гласови. Партиите и Катар ги отфрлија тие обвинувања, а Гади Ајзенкот го обвини премиерот дека се обидува да ги делегитимира изборните резултати.

Истражување и реакција на изборните органи

Израелската служба за внатрешна безбедност „Шин Бет“ соопшти дека истражува наводни неправилности, истакнувајќи дека истрагата нема цел да инкриминира цела заедница што гласала демократски и законски. Централната изборна комисија, пак, оцени дека одредени информации што се шират во јавноста се целосно неосновани.

Конечните резултати треба да му бидат официјално доставени на претседателот Исак Херцог во среда. Тој потоа ќе почне консултации со партиските лидери пред да му довери на еден од нив да се обиде да формира влада.

Фото: прес-материјал од настанот