Новак Ѓоковиќ најави дека сака да ја заврши кариерата по Лос Анџелес 2028

Новак Ѓоковиќ во интервју за „Каталонски спорт“ изнесе дека се надева дека ќе успее да игра на Олимписките игри во Лос Анџелес 2028 и дека би сакал да ја заврши кариерата носејќи го српското знаме, додека свесно го намалува бројот на турнири за да поминува повеќе време со семејството.

Освојувачот на рекордни 24 гренд слем титули и 40 мастерси го опиша олимпиското злато во Париз 2024 како круна на својата кариера и рече дека иднината ќе зависи од тоа како ќе реагира неговото тело и од други околности.

На прашањето дали натпреварувањето на следните Олимписки игри, во Лос Анџелес 2028 година, е сè уште цел или повеќе сон, Ѓоковиќ одговори:

„ Мислам дека е и двете. Сон и цел, но и желба. Многу пати во последните неколку години кажав дека би сакал да стигнам до Олимписките игри во Лос Анџелес 2028 година. Мислам дека можам да го остварам тоа. Ќе видиме. Ќе зависи од тоа како реагира моето тело и од многу други околности. Денес, не играм ниту се натпреварувам на толку многу турнири, ни приближно толку колку што сум имал во последните дваесет години. И решив да го направам тоа затоа што сакам да поминувам повеќе време со моето семејство и навистина да се посветам на различните улоги што ги имам во животот, како сопруг, татко, син или брат, додека развивам други работи што ме интересираат.

Секако, тенисот е сè уште во центарот на мојот професионален живот, но сакам да најдам и рамнотежа и затоа го променив мојот календар. Сепак, сè уште се надевам дека ќе можам да стигнам до следните Олимписки игри и да ја завршам кариерата со српското знаме на моите рамена.“ — изјави Новак Ѓоковиќ.

Изјавите ја потврдуваат промената во пристапот на Ѓоковиќ: селективно играње, намален календар и фокус на семејството и на други интереси надвор од теренот. Дали тој план ќе кулминира во Лос Анџелес 2028 како вистински завршеток на кариерата, ќе зависи од неговата физичка спремност и од околностите кои ги потенцираше.

Фото: прес-материјал од настанот