Нови патокази од ЕК: Црна Гора, Албанија, Украина и Молдавија ќе добијат насоки

Европската комисија го усвои пакетот на пред-пристапни проценки со цел да ја прилагоди политиката и процесите за проширување на Унијата и потврди дека по објавувањето на извештаите за напредок ќе објави патокази за четирите предводнички кандидати — Црна Гора, Албанија, Украина и Молдавија.

Кога и зошто ќе се објават патоказите

„Во извештаите за проширување на крајот на октомври, 28 октомври, имаме намера да објавиме патокази за овие држави. Сакаме да им помогнеме да го одржат реформскиот напредок, и тие патокази ќе ги утврдат следните чекори,“ рече еврокомесарката по состанокот на колеџот.

Марта Кос нагласи дека целта на патоказите не е да ги демотивира другите земји кандидати, туку да им послужат како инспирација и пример за тоа како да напредуваат во реформите.

„Именувањето на овие предводнички значи дека тие испорачале, а некои од нив под многу тешки услови. Многу години слушавме дека ние во ЕУ го заборавивме Западен Балкан, две од предводничките се од Западен Балкан и тие може да ги мотивираат сите останати,“ порача Кос.

Покрај објавата за патоказите, Комисијата најави дека ќе продолжи да се залага за промени во начинот на носење одлуки во Унијата — принципот на едногласност да се замени со квалификувано мнозинство во повеќе клучни области, меѓу кои енергетиката и воведувањето санкции.

Во пакетот се предлага и напуштање на принципот на едногласност во процесот на проширување: за отворање преговори и поглавја да се користи принципот на квалификувано мнозинство, што практично значи согласност од 15 од 27-те земји членки на унијата.

Комисиските предлози беа презентирани по состанокот на колеџот и се наменети да го одржат реформскиот замав кај кандидатите и да забрзаат одредени одлуки во рамки на ЕУ.

Фото: прес-материјал од настанот