Prokuroria: Tre shtetas turq të dyshuar për tentativë vrasjeje në Shkup
Sipas prokurorisë, sulmuesit hynë në banesë në rrugën Prashka dhe më pas tentuan të largohen përmes pikës kufitare Blace; dy të ndaluar, një arratisje në Kosovë.
Prokuroria Themelore Publike në Shkup nxori urdhër për zhvillimin e një procedimi hetimor kundër tre personave, shtetas të Republikës së Turqisë, të dyshuar si bashkëkryerës në veprën penale “vrasje” nga neni 123 paragrafi 1 në lidhje me nenin 19 (tentativë) të Kodit Penal.
Rrëfimi i ngjarjes
Sipas hetimeve, njëri prej të dyshuarve ka vepruar si ndihmës duke i çuar dy të tjerët, duke u treguar vendndodhjen e saktë dhe kodin e hyrjes së një pallati në rrugën "Prashka", ku qëndronin edhe dy shtetas të tjerë turq.
Të dyshuarit hynë në banesë dhe me shumë goditje me thikë tentuan me qëllim të marrin jetën e njërës nga viktimat. Viktima tjetër, që u mundua t'i ndalonte, u lëndua në krah.
Pas sulmit, të tre të dyshuarit tentuan të largohen menjëherë nga vendi përmes pikës kufitare Blace. Dy prej tyre u ndalën dhe u arrestuan; për ta u ngrit propozim për caktimin e masës së paraburgimit.
Sipas informacionit të forcave kufitare, ndihmësi arriti të ikë drejt Kosovës. Prokurori kompetent propozoi paraburgim për gjetje dhe privim nga liria, me qëllim që për të të shpallet një urdhër ndërkombëtar arresti.
Hetimet vazhdojnë dhe Prokuroria do të ndërmarrë hapat e mëtejshëm për sigurimin e provave dhe paraqitjen e çështjes për masat e nevojshme ligjore.
Foto: material shtypi nga ngjarja
