„ОНЕ Македонија Телекомуникации“ објави вработувања за третиот мобилен оператор

Компанијата „ОНЕ Македонија Телекомуникации“, преку која унгарската групација 4iG влегува на македонскиот телекомуникациски пазар, објави низа огласи за работа додека ја гради организациската структура на третиот мобилен оператор во земјата.

Огласите, објавени преку агенциите Manpower и The HeadHunter Group, се пред сè за работа во Скопје и опфаќаат раководни позиции, мрежни инженери и специјалисти за маркетинг, финансии, сајбер‑безбедност и корисничка поддршка.

Меѓу поважните позиции е раководител на одделот за маркетинг комуникации, за кого се бараат меѓу пет и десет години професионално искуство, високо образование и напредно познавање на англиски јазик, како и искуство во управување со тимови, подготовка на комуникациски стратегии и раководење со буџети. Слични квалификации се побаруваат и за раководителот на кориснички услуги.

Комерцијални и технички улоги

Компанијата бара и експерт за цени и сегментација на пазарот, позиција која ќе има директна улога во подготовката на понудата пред корисниците: задачите вклучуваат анализа на цените и услугите на конкурентите, истражување на потребите на потрошувачите и учество во креирање тарифни пакети. За ова место се побаруваат пет до десет години искуство во телекомуникации, комерцијална стратегија или анализа на пазарот.

Во техничкиот сектор се бара специјалист за основната телекомуникациска мрежа со една до три години искуство и познавање на мобилните мрежи и 5G‑технологијата. Другите објавени позиции вклучуваат експерт за сајбер‑безбедност, раководител за развој на производи, специјалист за големопродажни телекомуникациски услуги, деловен аналитичар и експерт за набавки.

Во огласите на ONE Македонија не се наведени конкретни суми за плати. Податоците од платформата МојаПлата.мк даваат контекст за заработувачката во секторот: според анкетните податоци, 80 отсто од вработените во телекомуникациската дејност во Македонија заработуваат меѓу 23.709 и 70.401 денар нето месечно. Кај телекомуникациските специјалисти опсегот е околу 28.100 до 66.900 денари, додека кај раководните позиции заработувачката може да биде значително повисока — на пример, 80 отсто од анкетираните маркетинг‑директори имаат месечни нето‑примања меѓу 52.500 и 138.452 денари. Овие податоци го одразуваат пазарот на трудот и не претставуваат понуда од новиот оператор.

Во јануари 2026 година компанијата доби дозволи за користење радиофреквенции, со што се отвори патот за воспоставување трет мобилен оператор, покрај Македонски Телеком и A1 Македонија. ONE Македонија планира првично да започне со услуги во Скопје, користејќи ги мрежите на постојните оператори додека ја гради својата инфраструктура. За изградбата е склучен договор со Ericsson, кој предвидува поставување повеќе од 500 базни станици во рамките на инвестициските планови на групацијата во земјата.

Од објавените огласи не може да се утврди колку лица компанијата веќе вработила, колку работни места остануваат непополнети и каков тим ќе формира пред почетокот на комерцијалната работа. Дел од конкурсите имаат истечени рокови, но нивната содржина останува јавно достапна. Унгарската групација 4iG претходно го посочи март 2027 година како планиран период за почеток на комерцијалните 5G‑услуги, но конкретен датум за старт сè уште не е соопштен.

Фото: прес-материјал од настанот