Онлајн трансакции над 530 милиони евра во првата половина од 2026 година

Асоцијацијата за е‑трговија на Македонија (АЕТМ) соопшти дека во првата половина од 2026 година вредноста на онлајн трансакциите надмина 530 милиони евра, што претставува раст од 14,1% во однос на истиот период лани. Анализата е направена врз основа на податоците објавени од Народната банка на Република Северна Македонија.

Клучни бројки

Вкупната вредност на трансакциите на е‑продавни места изнесува 32,611.2 милиони денари или 530,3 милиони евра. Од ова, кон македонските е‑трговци се реализирани 18,597.6 милиони денари или 302,4 милиони евра, што е зголемување од 14,9%.

Во рамките на вкупната сума, плаќањата со македонски платежни картички кон домашните е‑трговци достигнале 16,694.5 милиони денари или околу 271,5 милиони евра, со раст од 13,9%. Плаќањата со странски платежни картички кон македонските е‑трговци изнесувале 1,903.9 милиони денари или околу 30,9 милиони евра, што претставува пораст од 23,8%.

Македонските иматели на платежни картички кон странските е‑трговци реализирале онлајн трансакции во вредност од 14,013.7 милиони денари или околу 227,9 милиони евра, односно 13,3% повеќе во споредба со првата половина од 2025 година.

Вкупниот број на онлајн трансакции достигна 15,3 милиони, што претставува пораст од 10,1% во однос на истиот период лани. Најголем дел од трансакциите биле направени со македонски картички кај домашни е‑трговци — околу 8 милиони трансакции, со раст од 12,3%. Трансакциите на македонски иматели кај странски е‑трговци биле 6,45 милиони, со раст од 5,7%. Трансакциите направени со странски картички кон македонските е‑трговци надминале 904 илјади, со раст од 26,7%.

АЕТМ посочи дека податоците ја отсликуваат зголемената активност во онлајн трговијата во земјата во текот на првата половина од 2026 година.

Фото: прес-материјал од настанот