Општински штаб бара деблокирање и засилен надзор на депонијата „Краста“
Штабот го задолжи МВР за коридор до депонијата, Центарот за јавно здравје за упатства и ЈП „Чистота и зеленило“ за формирање еко‑патрол и неделен мониторинг.
Општинскиот штаб за заштита и спасување во Куманово одржа состанок за актуелната состојба на депонијата „Краста“, на кој присуствуваа претставници на надлежните институции, јавните претпријатија, здравствените установи и општинската администрација.
За да се овозможи непречено одлагање на отпадот од градот, учесниците донесоа заклучоци за преземање низа мерки: континуирано третирање на депонираниот отпад со земја и градежен материјал, засилено физичко обезбедување, поставување дополнителни камери за видео и термовизиски надзор, како и санација на оштетената заштитна ограда.
Од МВР – СВР Куманово се побара координација за отворање коридор до депонијата за да се овозможи пристап на комуналните возила, додека Центарот за јавно здравје е задолжен да подготви информации и насоки за спречување можни последици од нередовното собирање и депонирање на отпадот.
Еко‑патрол составен од локалното население
Директорот на ЈП „Чистота и зеленило“ беше задолжен, во соработка со локалното население, да формира еко‑патрол со претставници на месните заедници и невладините организации од селата Пчиња, Студена Бара, Вак’в и Винце. Таа група ќе врши неделен мониторинг на состојбата на депонијата „Краста“.
Спроведувањето на овие мерки има за цел да го обезбеди пристапот до локацијата и да ги намали здравствените и еколошките ризици додека не се воспостави нормалното собирање и одлагање на отпадот.
Фото: прес-материјал од настанот
