Осуден Италијанец кој изгради лажен „антички град“ од стиропор и наплаќаше 40 евра

Суд во Италија минатиот месец го осудил Франко Малозо откако било утврдено дека тој измислил и изградил лажен „антички град“ од 5.000 квадратни метри во близина на Виченца и наплаќал по 40 евра за влез тврдејќи дека локалитетот е стар 2.000 години.

Во судските списи се наведува дека комплексот во Аркуњано бил изграден со современа градежна механизација, обичен цемент и новоископан камен, наместо со рачно делкани камења од антички мајстори. Потпорниот ѕид на трибините дури содржел слој од стиропор, а скалите и седиштата биле вештачки обработени за да изгледаат стари.

Изведба и промоција

За да локацијата изгледа попривлечно, сопственикот поставил гипсни скулптури, бетонски столбови и ископал вештачки базен на местото каде што би била античката сцена. Комплексот бил промовиран под неколку звучни имиња и таму редовно се одржувале претстави и приватни тури.

Иако локацијата имала високи оценки и позитивни рецензии на онлајн платформи за патување, експертите уште при првата инспекција ја препознале измамата. Објектот бил прикажан како грчки театар на северот на Италија — регион каде што древните Грци никогаш не основале колонии, за разлика од јужните краишта — и бил промовиран како „поморски амфитеатар“, иако се наоѓа во шумски предел и е на повеќе од 80 километри од најблиското крајбрежје.

По десетгодишна правна постапка, италијанските власти ставија точка на случајот, квалификувајќи го како еден од најнеобичните примери на фалсификување комплетен археолошки локалитет во поновата историја. Пресудата означува крај на долгата истрага против приватна туристичка атракција што ги измамила посетителите за нејзината историска автентичност.

Фото: илустрација / Wikimedia Commons