Отворена истрага за криумчарење цигари: 19 физички лица и 4 правни лица под истрага

Специјализираното одделение на Јавното обвинителство нареди спроведување истрага против 19 физички и четири правни лица по кривичната пријава поднесена од Царинската управа, поради основано сомнение за организирано и координирано нелегално внесување и транзит на поголеми количини цигари со избегнување плаќање царински давачки, даноци и акцизи. Осомничените се товарат за Криумчарење, Царинска измама и Избегнување на плаќање акциза.

Начин на извршување

Предмет на истрагата се повеќе настани во текот на 2024 година при кои товарни моторни возила натоварени со цигари биле пропуштани преку граничните премини без соодветна царинска контрола, или пак стоката која била пријавена за транзит низ државата била истоварена на територијата на Северна Македонија додека возилата, празни, продолжувале кон излезните гранични премини.

Според досега обезбедените докази, во дејствијата биле вклучени возачи и одговорни лица во правни лица, како и царински и други службени лица. Дел од осомничените службени лица се сомничат дека овозможувале возилата да поминат без контрола, внесувале невистинити податоци во службените електронски системи, уништувале царинска документација или раздолжувале транзитни царински декларации и ослободувале гаранции иако стоката не била ставена на увид на одредишниот царински орган.

Вкупната штета на Буџетот на државата од дејствијата на осомничените е проценета на 250.149.784 денари, стои во соопштението на Јавното обвинителство.

Надлежниот јавен обвинител, проценувајќи дека се исполнети законските услови, до судијата на претходна постапка при Основниот суд Скопје достави предлог за определување мерка притвор спрема петмина осомничени; за еден осомничен е предложена мерка куќен притвор, додека за останатите се предложени мерки на претпазливост. До овој момент петмина осомничени, од кои тројца странски државјани, се недостапни на органите на прогонот.

Истрагата е во тек и обвинителството најави дека ќе следуваат дополнителни оперативни и истражни активности додека се проверува и документуира целата вклученост на лица и компании.

Фото: прес-материјал од настанот