Писториус: Критиките од САД за украинските напади во Русија се „прилично глупави“
Писториус рече дека критиките кон напади насочени кон стратешки воени цели се „прилично глупави“ по состанокот на сојузниците во Брисел.

Германскиот министер за одбрана Борис Писториус остро ги отфрли американските критики за украинските напади врз цели длабоко во Русија, по состанокот на сојузниците на Украина во седиштето на НАТО во Брисел во вторникот, и ги нарече таквите напади законити кога се насочени кон воени цели.
За време на истиот состанок, американскиот потсекретар за одбрана Елбриџ Колби изјави: „Додека јавната дебата е насочена кон спектаклот на нападите длабоко на територијата чија цел е да му нанесат болка на руското население, наша проценка е дека таквите напади не беа ефикасни во придонесувањето за завршување на војната, ниту пак помагаат во запирањето на руското напредување на фронтот.“ Колби не го спомна експлицитно неодамнешниот удар врз мостот што Русија го гради кон Крим, но дипломати велат дека неговите забелешки веројатно беа поврзани со тој напад.
Писториус возврати дека „да се критикуваат такви напади во Русија, чија цел е уништување стратешки воени цели и објекти што се користат за воени цели, според мене е прилично глупаво“. Тој додаде дека наместо критика треба да се разговара и да се осуди „видот тероризам“ што дење и ноќе се спроведува врз цивилното снабдување со енергија и вода во Украина и врз нејзината инфраструктура за греење, наместо да се критикуваат „законски и легитимни напади во Русија врз нецивилни цели“.
Реакции по ударот врз Кримскиот мост
Европските политичари на маргините на состанокот го опишаа украинскиот напад врз Керчкиот (Кримскиот) мост како легитимен и неопходен одбранбен потег. Генералниот секретар на НАТО Марк Руте нагласи дека е важно Украина да може да се брани и дека тоа може да вклучува и напади врз логистички центри. Британскиот министер за одбрана Вес Стритинг го нарече нападот „уште еден пример за украинската снаодливост и за апсолутната решеност на Украина да се брани од руската агресија“. „Стоиме со Украина додаде тој.
Украинската армија го нападна стратешки важниот Кримски мост при што се урна главниот лак на патниот мост и беше оштетен дел од коловозот. Претседателот Володимир Зеленски во вторникот наутро објави снимка на социјалните мрежи на која се гледа урнатиот главен лак и дел од коловозот. Мостот долг 19 километри ја поврзува континенталната Русија со анектираниот Крим; Украина го смета мостот за нелегално изграден на нејзина територија и повеќепати се обидуваше да го уништи за да ги наруши руските линии за снабдување.
Колби рече дека поддршката на сојузниците треба да биде насочена кон тоа Украина да ја држи линијата на фронтот и, кога е можно, да освојува територија. Тој додаде дека напади врз руската воена машинерија што го забавуваат напредувањето на Москва исто така би можеле да бидат во согласност со таквиот пристап. „Ова не значи дека Украина треба да биде принудена да се бори со врзани раце зад грб“, додаде тој.
Фото: прес-материјал од настанот


