Пленковиќ: Нема затворање на преговорите со ЕУ без договор за границата со Црна Гора

Хрватскиот премиер Андреј Пленковиќ предупреди дека Црна Гора не може да очекува затворање на преговорите со Европската унија доколку не се постигне договор за копнената граница.

Изјавата ја даде на седница на Хрватскиот сабор, одговарајќи на прашање на пратеникот од HDZ, Андро Крстуловиќ Опара, за спорните прашања меѓу двете земји.

Крстуловиќ Опара посочи на ставовите на црногорскиот претседател Јаков Милатовиќ поврзани со поставувањето спомен-плоча во Морињ и прашањето за границата, нагласувајќи дека тие не придонесуваат за брзо решавање на споровите.

Пленковиќ рече дека до Црна Гора е доставен предлог-договор за копнената граница и дека принципите на Бадинтеровата комисија за разграничување би требало да бидат прифатливи за Подгорица. Тој предупреди дека одбивањето на тие принципи може да има пошироки последици.

„Ако тоа не ѝ одговара на Црна Гора, тогаш испраќа порака дека не може да го прифати принципот на Бадинтеровата комисија и дека не верува во принципот според кој републичките граници се истовремено и граници меѓу државите настанати по распадот на поранешна СФРЈ“, рече Пленковиќ.

Тој додаде дека таков став би бил сериозен проблем за европскиот пат на соседот. Хрватска претходно инсистираше сите отворени прашања со Подгорица да се решат пред таа да добие поддршка за членство во ЕУ. Изјавата следи откако Подгорица на 20 октомври одлучи да го промени името на базенот во Котор кој носеше името на Зоран Гопчевиќ, поранешен чувар во логорот Морињ, а потоа го одобри и поставувањето спомен-плоча на местото на поранешниот логор.

Фото: прес-материјал од настанот