По 106 години: „Хромос бои и лакови“ постепено го запира производството во Загреб
Групацијата „Кансаи Хелиос“ најави постепено префрлање на производството од загрепскиот погон во капацитетите во Србија и Словенија.
По повеќе од еден век континуирано производство, еден од препознатливите производители на бои во регионот постепено ќе го прекине работењето на својот погон во Загреб. Сопственикот, групацијата „Кансаи Хелиос“, соопшти дека производството ќе биде префрлено во капацитетите на групацијата во Србија и Словенија.
Постепено префрлање, крај на долга традиција
Според најавата, реорганизацијата е дел од стратешко прилагодување на производствената мрежа во јадранскиот регион и ќе се спроведува во текот на наредните неколку години, а не како остро затворање. Со тоа ќе заврши едно значајно поглавје кое почнало уште во 1920: традицијата на производство на бои во Загреб трае 106 години.
Компанијата потекнува од претпријатие основано од Бернард Мостер и првично работела под името „Мостер“. По Втората светска војна носела име „Перуника“, а подоцна станала дел од „Хромос“. Во 1964 „Хромос“, „Катран“ и „Кутрилин“ се обединиле во големиот хемиски комбинат „Хромос – Катран – Кутрилин“.
Во времето на поранешна Југославија, „Хромос“ прераснал во еден од најзначајните производители во хемиската индустрија: тука се правеле бои и премази, пластични маси, вештачки смоли, пигменти и други хемиски производи. На крајот на 1970-тите комбинатот вработувал илјадници работници, а производите се извезувале во повеќе од 20 држави, меѓу кои западноевропските пазари и тогашниот Советски Сојуз.
По распадот и приватизациските процеси во 1990-тите, големиот комплекс бил поделeн на повеќе самостојни фирми. „Хромос бои и лакови“ продолжил да опстојува како одделна компанија и во 2001 станал дел од групацијата „Хелиос“. Во 2017 година јапонскиот „Кансаи Паинт“ го презел словенечки „Хелиос“, со што „Хромос бои и лакови“ стана дел од глобалната групација.
На загрепската локација има производствен комплекс од околу 100.000 квадратни метри, а пред најавата за затворање годишното производство достигнувало околу 15.000 тони. Портфолиото опфаќа стотици производи и системи: декоративни бои, фасадни премази, лакови и специјализирани решенија за подови, кровови и хидроизолација. Сопственикот појаснил дека, иако производствените машини постепено ќе се запрат, продажбата, маркетингот и дистрибуцијата ќе продолжат да функционираат во Хрватска.
Фото: прес-материјал од настанот