По осум години — Ванчо Петрушевски повторно на сцената на спомените со Гоце Тодоровски

На 25 август се навршуваат точно осум години од заминувањето на Ванчо Петрушевски, еден од најголемите и најомилените актери во нашата земја. Неговата харизма, акторскиот израз и ведриот дух оставија траен белег во културниот живот на Македонија.

Роден на 19 април 1951 година во Орешани, Скопје, Ванчо во 1975 година стана член на ансамблот на Драмскиот театар Скопје и низ годините гради богата сценска кариера во драмските и комичните улоги. Најпознатите негови остварувања останаа во Македонските народни приказни, каде од 1984 до 2017 година учествуваше во над 600 епизоди и стаса да биде симбол на хуморот и топлината во многу семејства.

Покрај тоа, Ванчо го збогатуваше радиоското поле со учество во култната емисија „Хихирику“, а неговите улоги во серии како „Солунски патрдии“, „Балкан бенд“, „Трст виа Скопје“, „Опстанок“ и „Тврдокорни“, како и во филмовите „Тетовирање“, „Среќна нова ’49“ и „Диво месо“, го вброија меѓу највлијателните актери во земјата.

Пријателство што ја промени судбината

Низ целата кариера на Ванчо се провлекуваше и неговото долго другарство со Гоце Тодоровски, кој, за жал, неодамна почина на 26 јули годинава. Нивното пријателство датира уште од петто одделение: Ванчо го поттикнал Гоце да се запише на Факултетот за драмски уметности откако Гоце прво почнал студии на Градежниот факултет во Скопје.

По дипломирањето, парот создаде незаборавни сцени и ликови кои влегоа во историјата на театарот и телевизијата. Прераното заминување на Ванчо на 25 август 2018 година, на 67-годишна возраст, остави голема празнина која, како што сам Гоце призна, никогаш не ја пополнил.

„Ванчо… доживеав голема жал и сè уште нема ден да не го споменам, навистина нема ден да не го спомнам“, рече Гоце во едно од своите последни интервјуа, борејќи се со тагата пред камерите. Денес публиката ги памети заедно — на сцената и во сеќавањето — преку нивниот препознатлив хумор и топлина.

Фото: прес-материјал од настанот