POC kërkon listën e pronës nga banorët e Qendrës për karta rezidente të parkimit

Ndërmarrja publike “Parkingjet - Komuna e Qendrës” (POC) ka vendosur rregull sipas të cilit banorët që dorëzojnë kërkesë për kartë rezidente parkimi duhet të dorëzojnë edhe listën e pronës (jo më e vjetër se 6 muaj), përveç kartës së vlefshme të identitetit dhe lejes së qarkullimit. Për lëshimin e listës së pronës paguhen 250 denarë.

Në faqen e POC më 4 gusht u publikuan rregullat e reja për përdorimin e shërbimeve të parkimit, në të cilat thuhet se parkimi rezident me përparësi tani lidhet me një njësie të caktuar banimi, dhe jo vetëm me adresën e regjistruar në kartën e identitetit të lëshuar nga Ministria e Punëve të Brendshme.

Nje banor i Qendrës reagon: “Pse nuk është e mjaftueshme karta e identitetit, apo mos vallë POC nuk i beson Ministrisë së Punëve të Brendshme që ka lëshuar dokument me vendbanimin tim. Pse duhet t’u dorëzoj punonjësve të POC edhe listën e pronës dhe t’i lejoj të shohin pjesë të gjendjes sime pronësore? I rritën çmimet për makinën e dytë dhe të tretë, e me këtë na krijojnë edhe obligime dhe shpenzime shtesë”, thotë një banor i Qendrës.

POC: lista e pronës identifikon njësinë e banimit

Nga ndërmarrja shpjegojnë se karta e identitetit konfirmon vendbanimin e deklaruar, por nuk lejon përcaktimin e saktë në cilën njësie konkrete banimi në një ndërtesë i referohet kërkesa dhe sa kontrata përdorimi janë lëshuar tashmë për atë njësi. “Kjo është e rëndësishme sepse numri dhe shuma e tarifës për kontratat e përdorimit përcaktohen sipas asaj nëse bëhet fjalë për makinën e parë, të dytë apo të tretë brenda të njëjtës njësie banimi. Karta e identitetit është provë e vendbanimit të deklaruar, por vetë nuk mund të përcaktojë saktësisht për cilën njësie konkrete banimi në objekt i referohet kërkesa dhe sa kontrata përdorimi janë lëshuar për të. Lista e pronës përdoret për identifikimin e njësisë së banimit dhe për zbatimin e saktë të modelit të ri”, thonë nga POC.

POC thekson se nuk e kërkon listën e pronës për të vlerësuar gjendjet pronësore të qytetarëve dhe se personi që dorëzon kërkesën nuk duhet të jetë pronar i apartamentit. “MPB përmes kartës së identitetit konfirmon vendbanimin e deklaruar të personit. Ndërmarrja publike POC, nga ana e saj, duhet të përcaktojë për cilën njësie banimi i referohet e drejta privilegjuese e parkimit, sepse modeli i ri është vendosur sipas njësisë së banimit dhe numrit të automjeteve që përfitojnë përparësinë. Pikërisht për këtë, lista e pronës ka një funksion të ndryshëm nga karta e identitetit – një dokument vërteton vendbanimin e personit, ndërsa tjetri identifikon njësinë e banimit për të cilën lëshohen kontratat e përdorimit”, shtojnë nga POC.

Në maj të këtij viti POC rriti çmimet e parkimit. Për makinën e dytë për banorët tarifa mujore u rrit nga 250 në 500 denarë, ndërsa për makinën e tretë nga 1.200 në 1.500 denarë. Banorët që përdorin parkim jashtë sektorit ku jetojnë do të paguajnë 500 denarë në muaj.

Ndryshimet prekën edhe parkimin zonal komercial: kartat ditore në Zona 1 u shtrenjtuan nga 300 në 400 denarë; kartat ditore prepay u rritën nga 800 në 1.000 denarë në Zona 1 dhe nga 700 në 900 denarë në Zona 2. Karaçeta mujore mobile biznes për subjektet juridike u rrit nga 2.000 në 2.500 denarë. Për të punësuarit në subjektet juridike me seli brenda hapësirës së ndonjë prej parkingjeve publike, çmimi u rrit nga 2.000 në 3.000 denarë, karta mujore për automjetet zyrtare në parkim të mbyllur tani është 4.000 denarë (rritje 1.000), ndërsa tarifa për heqjen nga “autokarra” e makinës së parkuar në mënyrë të pasaktë u rrit nga 3.500 në 4.000 denarë (rritje 500).

Banorët e lagjes Kapishtec, të organizuar në grupin “Për një Kapishtec të dinjitetshëm”, po mbledhin nënshkrime kundër çmimeve të reja më të larta, por deri tani POC nuk e ka ndryshuar vendimin.

Foto: SDK.MK)