Почина Ведрана Рудан на 76 години — побара приватно испраќање

Познатата и контроверзна хрватска писателка и колумнистка Ведрана Рудан почина на 76-годишна возраст по долга и тешка борба со редок облик на рак (рак на жолчните канали). На нејзината официјална Фејсбук страница беше објавена кратка порака: „Ведрана отиде на подрачје без сигнал“.

Рудан во мај 2024 година јавно соопшти дека се бори со болеста и од тогаш речиси целосно се повлече од медиумскиот живот. Нејзиното последно гостување пред камерите беше во емисијата „Недела во 2“ на 2 март 2025 година, каде отворено зборуваше за дијагнозата, за смртта и за својата поддршка за еутаназија.

Последна желба

Ведрана побара погребот да се одржи во најинтимен семеен круг; тоа беше нејзина последна желба и местото и времето на испраќањето нема да бидат објавени во јавноста.

Во неколку последни записи на својот блог „Девојка во прегратки на метастази“, таа брутално и без прикриеност ги опиша состојбите со болката и комплицираните односи со најблиските. Во една од објавите напиша: „Ја повикував смртта како што тоа го правам веќе година и пол. Залудно. Незамислив ужас е да се умира од рак… Во тој пекол постојат и коцкички мраз – медицинските сестри кои се грижат за нас и ни се насмевнуваат додека изгледаме како костури“.

Рудан ретко се појавуваше во јавноста по објавувањето на дијагнозата, но кога зборуваше, тоа беше без ублажување. Таа им порача на своите читатели дека ги сака и дека нејзината смрт може да се сфати „како заминување на подрачје без сигнал“.

Со бројните книги и колумни што ги остави, Ведрана Рудан ќе остане дел од регионалната книжевност и новинарство и ќе продолжи да влијае врз многу читатели.

Фото: прес-материјал од настанот