Политички реакции по изборите во Србија

Политичката промена на изборите во Србија предизвика низа реакции во Македонија, каде партии од власта и опозицијата ги протолкуваа резултатите како порака за одговорност и демократски стандарди.

Реакции од политичките табори

Опозицијата во настаните во соседството гледа потврда дека граѓанското незадоволство и барањата за промени можат да влијаат врз политичките текови во регионот. Лидерот на СДСМ, Венко Филипче, предупреди дека во Белград се видливи врски кои, според него, го пратат и македонското политичко живеење.

Венко Филипче изјави: „Тие бизнис, политички и медиумски спреги на Александар Вучиќ и до пред некое време на Виктор Орбан, се спрегите коишто го хранат, го хранеа режимот наш тука на Христијан Мицкоски. Пет тони дрога коишто директно водат до овие луѓе во Србија, а компаниите овде кај нас имаат директна релација со фирми блиски до премиерот Мицкоски“.

Од ВМРО‑ДПМНЕ возвратија со контра-обвинувања, повикувајќи се на минати контакти и наводни врски меѓу Филипче и српските власти кои, според нив, го доведуваат во прашање неговиот кредибилитет.

Валентин Манасиевски, портпарол на ВМРО‑ДПМНЕ, рече: „Кога Филипче зборува против Вучиќ, на народот му текнува како седеа и пиеја до рани зори, како го пречекуваше на граница, како марихуаната одеше за Србија, како за директор на ЕСМ со Заев ставија човек на Вучиќ, како за ПР-шеф во партијата го ставија токму неговиот кум Башановиќ и многу други поврзаности за кои допрва ќе се дознава. Венко Филипче и Александар Вучиќ се едното исто“.

Помалите партии дадоа поинакви, но определени пораки. ЛДП ја поздрави поддршката на српските граѓани за политички промени и нагласи дека за демократија се потребни независни институции, правда за сите и продолжување на патот кон Европската унија.

Во соопштението на ЛДП се вели: „ЛДП изразува надеж дека со овој демократски чин, Србија конечно се враќа на вистинскиот европски пат. Оваа победа е јасен сигнал и предупредување за сите регионални политичари кои мислат дека со контрола, монопол и трошење на народни пари можат вечно да го држат сопствениот народ во заложништво“.

Вреди го поздрави успехот на албанската коалиција и на Студентската листа во Србија и побара од новата Влада да ги почитува правата на малцинствата и да отвори ново поглавје во односите со Косово: „Се надеваме дека новата Влада на Србија ќе најде сила и политичка волја за дијалог и соработка со Република Косово. Дијалог помеѓу рамноправни страни, кој треба да кулминира со меѓусебно признавање помеѓу две независни држави“.

Во врска со прашањето за предвремени парламентарни избори во земјава, СДСМ повтори дека нема да биде алиби на власта — Филипче порача: „тие имаат двотретинско мнозинство, самите нека одлучат“.

Фото: прес-материјал од настанот