Повеќе од половина од прекршоците на „Безбеден град“ се кај возила со странски таблички, информира МВР

Министерството за внатрешни работи (МВР) информира дека од почетокот на функционирањето на системот „Безбеден град“ во февруари до 20 август се евидентирани вкупно 310 865 прекршоци, при што повеќе од половина од нив се направени од возила со странски регистарски ознаки.

"Министерството за внатрешни работи ја известува јавноста дека во периодот од 02.02.2026 до 20.08.2026 во системот 'Безбеден град' евидентирани се вкупно 310 865 прекршоци, од кои најголем дел се однесуваат за управување на возило со брзина поголема од дозволената – 301 835 прекршоци", велат од МВР.

Од вкупниот број прекршоци, точно 180 378 се евидентирани кај возила со странски регистарски ознаки. За потесниот временски прозорец од 19 до 20 август, МВР посочува дека се регистрирани 5 514 прекршоци од страна на возила со таблички различни од домашните.

"Во однос на прекршоците сторени од возила со странски регистарски ознаки, во периодот од отпочнување на функционирање на системот „Безбеден град“ регистрирани се вкупно 180 378 прекршоци, додека во периодот од 19.08.2026 до 20.08.2026 регистрирани се 5 514 прекршоци од возила со странски регистарски ознаки", се наведува во соопштението од МВР.

Контрола и казни на „Табановце"

Од средата, на 19 август, МВР почна со изрекување казни за странските возачи кои сториле сообраќајни прекршоци додека поминувале низ територијата на државата. Контролата започна да се спроведува на граничниот премин „Табановце“ на македонско-српската граница, на излез од државата, каде се проверуваат возила што системот претходно ги евидентирал.

"На возачите им се соопштува дека е евидентиран прекршок и им се издава записник за сторен сообраќањен прекршок со прекршочен платен налог, со можност казната да ја подмират согласно законската постапка", соопшти МВР. Првата примена на овој механизам предизвика метеж и зголемен број возила на преминот, што МВР го објасни со фактот дека се обработуваат и претходно евидентираните прекршоци. Најголемите негодувања стигнаа од државјани на соседна Србија.

Од МВР информираат и дека е пуштена во функција нова веб-апликација преку која странските возачи може брзо да проверат дали имаат евидентирани прекршоци од системот „Безбеден град“, да ги видат издадените прекршочни платни налози и електронски да ги платат глобите.

Фото: МВР