Пожар во Дебрца: над 50 хектари изгореа поради палење стрништа, спасени посеви и фотонапонска централа

Неодговорното палење на стрништа и земјоделски отпад по завршувањето на есенските полски работи предизвика неколку активни пожари во Општина Дебрца, кои зафатија големи површини под трева, ниска вегетација и земјоделско земјиште. Од потегот од селото Белчишта кон Лешани и Злести изгореа над 50 хектари полско земјиште со висока сува вегетација.

Пожарникарите водеа тричасовна борба со огнената стихија и успеаја да спасат приватни посеви со пченка и фотонапонска централа кои беа на чекор од целосно уништување.

За гаснењето интервенираа противпожарни служби од регионот, вклучително и кичевските пожарникари. Локалните власти истакнуваат дека ситуацијата со човечката негрижа е алармантна и дека неразумното палење ги исцрпува ресурсите на единиците за итни интервенции.

Апел за чистење на оџаците пред грејната сезона

Покрај апелите за забрана на палење на отворено во полјата, противпожарните служби упатуваат сериозно предупредување до граѓаните за чистење на оџаците пред настапувањето на студените денови. Неисчистените оџаци секоја есен се меѓу водечките причини за пожари во објектите и за големи материјални штети.

Противпожарните екипи потсетуваат дека најголемиот дел од пожарите во овој период се последица на човечки фактор. Граѓаните кои ќе забележат чад, отворен оган или неисправни инсталации треба веднаш да ја известат Противпожарната служба на бесплатниот број 193 или Центарот за управување со кризи на 112.

Фото: прес-материјал од настанот