Пожар во „Орловото гнездо“ (Келштајнхаус) во Баварија, приведен осомничен

Германската полиција соопшти дека привела осомничено лице по пожарот кој избувнал во некогашното планинско засолниште на Адолф Хитлер во Баварија, познато како „Орловото гнездо“ (Келштајнхаус), сместено на врвот Оберсалцберг во јужниот дел на Германија.

Околу 200 пожарникари беа ангажирани за гасење на огнот во оддалечениот и тешко достапен објект. При пристигнувањето, екипите затекнаа високи пламени јазици и објект целосно зафатен од огнот, соопшти полицијата.

Пристапот затворен, истрага во тек

Полицијата наведе дека едно сомнително лице е задржано во привремен притвор, додавајќи дека нема повредени и дека внатре не бил пронајден никој.

Алармот за пожар бил активиран од детектор за чад во петокот вечерта околу 21:50 часот. Официјалната причина сè уште не е објавена, но германските медиуми јавуваат дека истражните органи се сомневаат на подметнување.

Метеоролошките камери регистрирале дека зданието горело и во раните утрински часови во саботата додека на алпскиот врв паѓал снег. Пристапниот пат до комплексот е блокиран од полициски сили, а весникот Bild јави дека властите привеле мотоциклист кој бил сретнат на патот кон местото.

Изградено во периодот меѓу 1937 и 1938 година, „Орловото гнездо“ е дел од историското наследство на Третиот Рајх врзано за Адолф Хитлер — режимот одговорен за смртта на милиони Евреи, Роми, ЛГБТК и комунисти во Холокаустот. Објектот беше замислен како споменик на власта, иако Хитлер ретко го посетувал. Зданието ја помина Втората светска војна без оштетувања, а од 1952 година во него функционира ресторан и музејска поставка посветена на нацистичкото минато на локацијата.

Фото: Икс)