Прерано почина наставничката Јасмина Атанасоска од Гостивар

Со тага и болка, колективот на Основното општинско училиште „Гоце Делчев“ од Гостивар се прости од својата колешка Јасмина Атанасоска, одделенска наставничка која прерано почина.

Емотивна посвета од училишниот колектив

Во објавата од училиштето се наведува дека нејзиното заминување оставило голема празнина меѓу колегите и учениците.

„Како наставник, таа беше дел од светот на децата, од нивните први училишни чекори, од нивните знаења, радости и спомени. Зад себе остави трага во училишните клупи, во срцата на учениците и во сеќавањата на сите нас кои имавме чест да бидеме нејзини колеги“, стои во посветата.

Колегите истакнуваат дека ќе ја паметат со почит и благодарност за заедничките мигови и за нејзиниот придонес во образованието на многу генерации ученици.

„Нејзиното заминување е голема загуба за сите нас кои имавме можност да ја познаваме, да работиме и да споделуваме заеднички мигови со неа“, додаваат од училиштето и упатуваат искрено сочувство до семејството на починатата, со пораката дека Јасмина засекогаш ќе остане во нивните спомени.

Фото: прес-материјал од настанот