Превозници од Западен Балкан доставија барања во Скопје пред состанокот на 1 септември

Здруженијата на превозници од Западен Балкан одржаа состанок во Скопје и доставија барања до Европската комисија пред состанокот закажан за 1 септември во Брисел. Главната порака беше целосно почитување на правилото за 90 дена престој за возачите на камиони кои транзитираат низ земјите на Европската унија и прецизна евиденција на влезовите и излезите.

Точна евиденција и пресметка на деновите

На состанокот беше нагласено дека е неопходно правилно броење на 90‑те дозволени дена престој за граѓани на трети земји во период од 180 дена и дека секој влез и излез мора да се запише за да нема погрешни пресметки. Превозниците инсистираат и краткотрајните влезови од неколку часа да не се сметаат за цел ден.

Биљана Муратовска, генерален секретар на Асоцијацијата на превозници - Макам‑транс, кажа: "Ние ќе бидеме трпеливи, ќе се трудиме да направиме шеми за движење на возачите. Сега е период на годишни одмори, меѓутоа она што следува од септември натаму ќе биде многу трагично ако не најдеме решение. Не сакаме да му наштетиме на никого, ниту на Европска Унија, ниту на нашите држави, а најмалку на нас самите превозниците, но ако сме принудени ќе организираме протести со коишто уште еднаш ќе ги потсетиме сите дека сепак постои проблем којшто треба да се реши"

Неџо Мандиќ, претседател на Здружението за меѓународен транспорт Белград, предложи транзициско прилагодување наместо целосна промена на договорот од пред 41 година и објасни: "Она што ние го предложивме во последното писмо како преодно решение е следното, кога Европската комисија не сака да го менува договорот од пред 41 година иако веќе одамна требаше да се смени, се согласуваме да не се смени договорот, само да се направи прилагодување. Тоа значи дека, ако е речено, граѓаните од трети земји да може да престојуваат 90 дена во последните 180 дена тогаш да се држат на тоа правило. Како ќе биде тоа? Така што ќе знаеме дека денот не е еден час ниту една минута туку дека денот трае 24 часа."

Зијад Шариќ, претседател на УО на здружение за транспорт на Босна и Херцеговина, предупреди дека не можат да ги чекаат ветувањата и роковите: "Постојано нешто ни ветуваа и ни даваа рокови до кога проблемот ќе се реши но ние тие рокови не можеме да ги чекаме. Денеска донесовме заеднички заклучок а тоа е дека како што знаете сите живееме во демократски држави и во демократска Европа и единствено демократско право е преку протести да дојдеме до остварување на нашата цел. Европа моментално не не слуша но и да не слуша се прави нема, бидејќи мисли дека ќе се откажеме од нашите барања. Ние нема да се откажеме од нашите барања бидејќи сакаме да ги заштитиме нашите возачи."

Според податоците презентирани на средбата, со проблемот за престој се засегнати 100 000 возачи од Западен Балкан, од кои 17 000 се од Македонија. Превозниците од Македонија и од регионот организираа масовни протести во јануари годинава поради правилата во Шенген зоната, а тогашна владина комуникација со европските претставници беше најавена со цел да се најде решение.

Фото: прес-материјал од настанот