Пронајдена 37-годишна бугарска државјанка на Шар Планина

Пронајдена е 37-годишната бугарска државјанка која синоќа беше пријавена за исчезната на Шар Планина — таа денеска во 14:50 часот е лоцирана во селото Горна Лешница и се наоѓа во добра здравствена состојба, соопшти Центарот за управување со кризи (ЦУК).

Како тече потрагата

Според ЦУК, жената била дел од група од четири странски државјани што вчера се упатиле кон Титов Врв, а трите лица од групата се вратиле во вечерните часови и пријавиле дека ја немаат со себе.

„Трите лица од групата се вратиле во вечерните часови, при што констатирале дека таа не се вратила со нив и дека немаат информации за нејзината локација. По пријавувањето, веднаш почнала потрагата по неа“, се вели во соопштението.

Во потрагата биле вклучени припадници на Специјалните единици од Скопје, полициската станица „Попова Шапка“, ЈУНП „Шар Планина“ и Дирекцијата за заштита и спасување – Подрачно одделение Тетово.

За пребарувањето беа користени два дрона со термални камери, полициски хеликоптер „bell 212“ и спасувачки тим од САЕ „Тигар“.

ЦУК ја координираше акцијата во текот на целата потрага со надлежните институции и екипи на терен, а по пронаоѓањето е утврдено дека жената е во добра здравствена состојба.

Фото: Принтскрин