Прваче нападнато, соблечено и снимано во соблекувалната во Кочани

Прваче во Кочани било физички нападнато, соблечено и снимано во соблекувалната од спортска сала на основно училиште, што предизвика гнев и загриженост во јавноста.

Од МВР беше пријавено дека случајот е евидентиран на 24.09.2026 во 12:45 часот. "На 24.09.2026 во 12:45 часот во ОВР Кочани, 42‑годишен маж од Кочани пријави дека во соблекувална од спортска сала на основно училиште во Кочани, неговото шест и пол годишно дете било физички нападнато, соблечено и снимано со смарт часовник од неколку други малолетни деца, поголеми од неговото дете." За настанот се известени надлежен Јавен обвинител и Центарот за социјална работа.

Реакции на социјалните мрежи

По веста следува бран на реакции на социјалните мрежи — корисниците изразуваат згрозеност и бараат итни мерки. Дел од коментарите гласеа:

"За ова покрај родителите на децата насилници, треба да одговара и одделенскиот наставник. Прваче е дете на кое перманентно треба надзор."

"Под итно да се отворат поправни домови за збеснатите деца, а таму покрај воспитување да им се дадат и тешки физички работи, собирање смет, копање паркови, пошумување... Родителите да бидат казнети за негрижа и невоспитување на збеснатите деца, но не со 30 - 40 евра туку со затвор...!!!"

"Аман ние игравме и во темница на улица, а сега да се плашиш дете и во школо да пуштиш од кој, од невоспитани, пуштени од ланец, па збеснати и деца и родители..."

"Под итно отстранување на тоа монструмче од дете, и одземање од родителите додека нема ригорозни казни, а и за наставниците. Каде биле кога се работи за толку мали деца? Греота, тоа прваче траума за цел живот. Ако не преземат нешто стручните служби и голема казна за учителката негова, тогаш ќе почнат родителите сами да ја земат правдата во свои раце."

"Министерке, просветни работници, родители! Ова ги помина сите граници на нормалност, ова е веќе лудило. 6‑годишно дете малтретирано? Булинг....Каков булинг! Лудило!. Толку се потресуваме секој ден од вакви вести. Не можам да се замислам на местото на родителите на ова дете. Стварно не знам што би направила."

Кој учествувал, што се случувало во соблекувалната и како дошло до инцидентот, надлежните допрва треба да утврдат. Следуваат истражни активности за да се постави јасна слика и да се утврдат евентуалните одговорности и мерки.

На јавноста ѝ се наметнуваат и пошироки прашања — дали растечкиот пристап на децата до смарт‑технологиите придонесува за вакви случаи и дали се потребни построги санкции за родителите или системски мерки во училиштата, откако меѓуврсничкото насилство зачести.

Фото: прес-материјал од настанот