Пуштена во употреба првата линија на „Градскиот воз“ од Зелениково до Скопје

Пуштена е во употреба првата од три планирани линии на „Градскиот воз“, која го поврзува Зелениково со Транспортниот центар во Скопје; возовите ќе сообраќаат осум пати дневно.

Симболично отворање и следни фази

Со симболично возење од железничката станица во Зелениково до Скопје, премиерот Христијан Мицкоски, во придружба на вицепремиерот и министер за транспорт Александар Николоски, директорот на ЈП „МЖ – инфраструктура“, Синиша Ивановски, и скопскиот градоначалник Орце Ѓорѓиевски, го означија официјалното пуштање во употреба на првата линија.

Премиерот оцени дека условите на делницата од Зелениково до центарот на Скопје се европски и дека со градскиот воз патувањето ќе се скратува. Тој потенцираше дека иако со ова не се решаваат сите проблеми, станува збор за чекор напред во подобрувањето на транспортот и состојбата со животната средина, особено пред почетокот на грејната сезона.

За вицепремиерот и министер за транспорт Александар Николоски, „Градскиот воз“ е почеток на реализацијата на визија за поефикасен јавен превоз, намалување на загадувањето и зголемена мобилност на жителите на Скопје и околината. Тој посочи дека пред две години железничкиот превоз бил запоставен, додека денес постои активен карго-превоз и сега и градски воз, и повтори дека беше ветено почетокот на 1 септември.

Директорот на ЈП „МЖ – инфраструктура“, Синиша Ивановски, информира дека патувањето од Зелениково до Скопје и обратно ќе трае неполни 25 минути. "Од Зелениково до Скопје сега имаме 25 километри реконструирана железничка мрежа. На оваа делница имаше бетонски прагови од 1959 и 1963 година, а состојбата на пругата беше крајно незавидна, поради што возовите сообраќаа бавно, дури и со брзина од само 20 километри на час. Во овој момент возовите без проблем сообраќаат со брзина од 80 километри на час, а на одредени делови и до 100 километри на час. Од Скопје до Зелениково се стигнува за неполни 25 минути", посочи тој.

На делницата има повеќе станици и постојки, вкупно 11 патни премини, а на секоја станица се предвидени паркиралишта за велосипеди. Од граѓаните беше побарано да ги почитуваат сигналите на патните премини.

Според најавите, се работи на проектирање и на другите две линии: втората ќе го поврзува Миладиновци преку Илинден и Маџари со централната железничка станица во Скопје, а третата ќе се протега од централната станица преку Скопје-Север и Ѓорче Петров до Волково.

Цената на билетот за градскиот воз е 40 денари во еден правец или 70 денари повратна карта.

Фото: МИА