Ракетен напад го погоди клучниот систем на нафтоводи во Саудиска Арабија

Во ракетен напад беше погоден клучен систем на нафтоводи во Саудиска Арабија, соопштија власти, по што беа предизвикани повеќе пожари а цевководот беше затворен како мерка на претпазливост.

Првичната анализа на сателитските снимки покажува дека погодени се пумпните станици лоцирани веднаш до цевководот: на една од станиците се видливи големи штети предизвикани од пожар, додека на друга има помал пожар од кој се издига густ и црн чад.

Засега не е познато кој стои зад нападот. Американски функционери изјавиле дека нафтоводот бил погоден од беспилотни летала што дошле од правецот на Ирак.

Ескалација и ризици за транзитот на енергијата

Нападите следат само неколку дена откако Хутите зазедоа стратешки важен пристанишен град на Црвеното Море во Јемен, што може дополнително да го загрози транспортот на енергија во регионот.

Погодениот цевковод стана клучен за Саудиска Арабија од почетокот на војната меѓу САД и Иран, овозможувајќи транспорт на околу пет милиони барели нафта дневно, кои до тогаш се транспортираа со танкери преку Персискиот Залив.

Поправката на пумпните станици може да биде полесна отколку санирањето на евентуални сериозни оштетувања на самиот цевковод, но точниот обем на штетата ќе одреди колку долго ќе останат нарушени испораките.

Инцидентот доаѓа откако Саудиска Арабија информираше пред ОПЕК дека нејзиното производство на сурова нафта минатиот месец нагло се намалило, достигнувајќи ниво на најниско од 1990 година.

Фото: Принтскрин