Sergio Ramos lidhur me Getafen — Torres konfirmon kontaktet

Sergio Ramos mund të rikthehet në La Liga me një transfer te Getafe, ku do të bashkohej me ish-shokun e tij nga Real Madrid, Dani Carvajal. Presidenti i Getafes, Ángel Torres, konfirmoi se ka pasur biseda me përfaqësuesit e Ramosit, por të rhoqi vëmendjen se transferimi nuk është prioritet për klubin në këtë moment.

Torres foli për këtë mundësi në programin Tablero Deportivo të Radio Nacional de España (RNE) dhe tha se agjenti i lojtarit — që është edhe vëllai i tij — ka qenë në kontakt me të.

"Agjenti i tij, i cili njëkohësisht është dhe vëllai i tij, ka biseduar me mua. Ne kemi gjashtë qendërmbrojtës dhe kjo nuk është pozicioni që trajneri aktualisht kërkon të forcojë. Ramos është në listën e përforcimeve të mundshme," tha Torres. "Ai mund të vijë, kemi punuar për këtë prej kohësh, por nuk është prioritet për ne," shtoi presidenti i Getafes, i cili nuk përjashtoi mundësinë që transferimi të realizohet në afatin dimëror.

Pasqyra e karrierës

Getafe befasoi me njoftimin më 13 tetor për nënshkrimin e Dani Carvajal, i cili firmosi kontratë deri në fund të qershorit 2027. Carvajal luajti për ekipin e parë të Realit nga 2013 deri në 2026, fitoi disa herë Ligën e Kampionëve dhe Kupën Botërore për klube, dhe ishte pjesë e përfaqësueses së Spanjës që fitoi Euro 2024.

Ramos nisi karrierën te Sevilla, kaloi në Real Madrid në 2005 dhe qëndroi 16 vjet si një prej udhëheqësve dhe kapiteneve të skuadrës. Për Realin regjistroi 671 paraqitje zyrtare, shënoi 101 gola dhe fitoi 22 trofe, përfshirë katër tituj në Ligën e Kampionëve dhe pesë tituj në La Liga. Me Spanjën fitoi Kupën e Botës 2010 dhe Euro 2008 dhe 2012, duke arritur 180 ndeshje — më shumë se çdo lojtar tjetër në histori të kombëtares.

Pas largimit nga Real në 2021, Ramos luajti për Paris Saint-Germain dhe u kthye te Sevilla në 2023, përpara se të bashkohej me Monterrey në shkurt 2025. Në Meksikë zhvilloi 34 ndeshje dhe shënoi tetë gola; marrëveshja përfundoi në dhjetor 2025. Aktualisht pa skuadër, Ramos do të mbushë 41 vjeç në mars 2027 dhe duket i vendosur të vazhdojë karrierën. Një kalim te Getafe do ta rikthente atë në elitën e futbollit spanjoll dhe do ta vendoste përsëri krah Carvajalit. Getafe pas tetë javësh në La Liga ka tetë pikë dhe zë vendin e 14-të, ndërsa luan edhe në Ligën e Konferencës 2026/27.

Foto: material shtypi nga ngjarja