Ранети се 50 деца од експлозија пред училиште во Кабул, повеќето се во критична состојба

Најмалку 50 млади луѓе се повредени откако рачна граната експлодирала во близина на приватното училиште „Шам-е Хедајат“ во западниот дел на Кабул, а поголемиот дел од повредените се ученици.

Експлозијата се случила синоќа во населбата Дашт-е-Барчи, пред училиштето. Локални извори известиле дека експлозиви биле фрлени во училишниот комплекс.

ОН повика на независна истрага додека бројот на повредени расте

Специјалниот известувач на ОН за Авганистан го осуди нападот и повика на независна истрага. Талибанските власти го потврдија инцидентот, но не дадоа дополнителни детали за природата на настанот ниту пак идентификуваа осомничени.

Болнички извори велат дека многу од повредените деца се во критична состојба и им е потребна итна медицинска помош. Повеќето од ранетите се под 18 години, а извештаите покажуваат дека на многумина им е итно потребна трансфузија на крв.

Ниту една група официјално не ја презеде одговорноста за инцидентот. Дашт-е-Барчи, област каде доминираат Хазари и шиитската заедница во западен Кабул, често е цел на смртоносни напади врз цивили, ученици, образовни институции, џамии и други јавни места.

Последната експлозија повторно го отвори прашањето за безбедноста во областа и способноста и подготвеноста на талибанските власти да спречат напади врз ранливите и малцинските заедници.

Фото: прес-материјал од настанот