Републичката изборна комисија потврди „Студентска листа – Студентите победуваат“
РИК со 19 гласови ја потврди листата; коалицијата Народна Србија ја повлече својата листа и ќе им се приклучи на студентите.
Републичката изборна комисија (РИК) на Србија во вторникот ја потврди листата „Студентска листа – Студентите победуваат“ со 250 кандидати за предвремените парламентарни избори закажани за 25 октомври. Сите 19 присутни членови на комисијата гласаа за прифаќање на листата.
Членката на РИК, Марија Јовановиќ, соопшти дека студентското движење поднело 69.099 правно валидни потписи. Таа наведе дека изборниот список ги исполнува условите за застапеност по пол и дека приложената документација е правно валидна.
Масовна мобилизација при предавањето на потписите
Потписите беа доставени до РИК по викендот на собирање низ цела Србија, каде поддржувачите често чекаа повеќе од шест часа за да се потпишат. На собирот во понеделникот, кој започна пред зградата на Ректоратот, беше пријавено дека околу 6 000 луѓе биле присутни во 17:50, а во колоната кон РИК тргнале околу 8 700 лица.
Опозициската коалиција Народна Србија стана првата што ја повлече својата изборна листа и соопшти дека ќе ја поддржи студентската листа. Коалицијата, која ја сочинуваат Народното движење на Србија, Еколошкото востание и Новото лице на Србија, во вторник (15 септември) објави дека ја повлекува својата листа „Народен избор“ и ќе ја поддржи листата на студентите на изборите на 25 октомври.
Мирослав Алексиќ, лидерот на Народното движење на Србија, ја образложи одлуката со зборовите: „Нашиот став е референдумска атмосфера. За да го постигнеме тоањ мора да направиме одредени отстапки. Имав разговори со претставниците на студентската листа и со други колеги од опозицијата и ја донесовме оваа одлука како еден вид наш придонес во однос на референдумската атмосфера“.
Дел од аналитичарите во Србија ја оценија одлуката за повлекување како политички прагматична. Андреј Шево, истражувач во Институтот за филозофија и социјална теорија, оцени дека коалицијата има мало избирачко тело и веројатно би имала тешкотии да го премине изборниот цензус; самостојното учество можеше да одвлече дел од гласовите од другите опозициски субјекти.
Студентската листа во вторникот во Нови Сад ја започна презентацијата на својот 11-точковен план под наслов „Знаеме како“, а кампањата низ цела Србија ќе трае до 19 септември.
Фото: Принтскрин
