Ревизија: слабости во ИТ и заштитата на податоците во ПИОМ

Државната ревизија откри серија слабости во заштитата на податоците и управувањето со информациониот систем во Фондот за пензиско и инвалидско осигурување (ПИОМ), при што ревизорите предупредуваат на ризик од губење податоци и подолги прекини.

Во извештајот се наведува дека нема усвоен план за развој на компјутерскиот систем, а од вкупно 57 работни места за информатичари пополнети се само 17.

„Особено е неповолна состојбата во Одделението за ИТ инфраструктура и поддршка, во кое е пополнето само едно од 13 работни места, а нема ниту вработени лица задолжени за информациска безбедност. Недостигот од кадар и стручни знаења ги ограничува можностите за ефикасно управување со ИТ системот, навремено отстранување на проблемите и спроведување на безбедносните контроли.”

Технички недостатоци и проблеми со физичката заштита

Ревизорите укажуваат дека дел од компјутерите користат стари програми за кои повеќе нема техничка поддршка и дека некои машини немаат обновена антивирусна заштита. Набавката на нова опрема за чување податоци не се реализирала поради недостиг на пари, а не е донесен ниту одобрен план за враќање на системот во работа по сериозен дефект или напад.

„Овие состојби претставуваат ризик од губење на податоци, неможност за навремено враќање на информациите и подолг прекин во функционирањето на информацискиот систем. Во однос на физичката безбедност, утврдено е дека пристапот до серверските простории не е проследен со електронска евиденција или видеонадзор, системите за гасење пожар не се одржуваат редовно, а во одделни подрачни единици резервното напојување е неисправно.”

Како мерки, ревизорите препорачуваат зголемување на бројот на стручни лица, подобрување на заштитата на податоците и изработка на планови за справување со прекини. Од шесте наоди на кои Фондот одговорил, тој целосно го прифаќа само оној за истечениот безбедносен сертификат на веб-страницата, кој веќе е обновен, а делумно прифаќа забелешки за пристапот до системот, заштитата на резервните копии, плановите за работа при прекин и обезбедувањето на просториите. ПИОМ не го прифаќа наодот дека компјутерската мрежа е недоволно раздвоена, тврдејќи дека веќе има одделни делови за различни намени.

Фондот е во фокусот и поради предупредувањата на Фискалниот совет дека линеарното покачување на пензиите го зголемува недостигот од пари. Директорот Никола Мемов го брани покачувањето како помош за пензионерите со ниски пензии и предлага постепен раст на придонесите, уверувајќи дека исплатата на пензии е сигурна бидејќи државата ги додава парите што недостигаат.

Фото: прес-материјал од настанот