Nënat pa përfitime për muaj — Levica e akuzon Fondin e Sigurimit Shëndetësor

Levica paralajmëroi se në ditët e fundit në parti kanë ardhur dëshmi të reja nga nënat që konfirmojnë se kaosi me pagesat e përfitimeve për lindje në Fondin e Sigurimit Shëndetësor vazhdon.

Sipas dëshmive, disa gra tregojnë se nuk kanë marrë asnjë pagesë, disa kanë marrë vetëm pjesë të mjeteve që u takojnë sipas ligjit, ndërsa një numër i madh ende nuk ka marrë informacion se kur do t’u kryhet pagesa.

Veçanërisht shqetësojnë rastet me shtatzëni patologjike

Evgenija Stankoska në një konferencë për shtyp theksoi se ndër më të cenueshmet janë gratë që janë në pushim mjekësor për shkak të një shtatzënie patologjike, të cilat kanë shpenzime shtesë dhe pikërisht në periudhën kur u nevojitet më shumë siguria financiare mbeten pa të ardhura për muaj me radhë.

Stankoska nënvizoi se përfitimi për lindje nuk paraqet ndihmë qeveritare, por një të drejtë ligjore që rrjedh nga marrëdhënia e punës dhe nga kontributet që gratë kanë paguar për vite me radhë në sistem. "Puna juaj vlen vetëm kur krijon fitim, dhe nënësia juaj vlerësohet vetëm kur shërben si statistikë për lindshmërinë dhe si dekor për fjalimet politike konservatore", tha Stankoska.

Nga Levica akuzuan se drejtori i ri i Fondit të Sigurimit Shëndetësor, Zlatko Perinski, nuk arriti t’i japë fund këtij problemi, ndërsa ministri i Shëndetësisë, Sasho Klekovski — i cili deri kohët e fundit e mbante funksionin e drejtorit të Fondit — nuk mund të distancohet nga përgjegjësia. "Kërkojmë pagesën urgjente të të gjitha kompensimeve të prapambetura për lindje. Po ashtu, shpjegim publik për pagesat pjesshme, vendosjen e afateve të qarta dhe të fikse për pagesën e përfitimeve për lindje, dhe që Fondi i Sigurimit Shëndetësor të ndalë t’i hedhë përgjegjësinë tek të tjerët dhe më në fund ta zgjidhë problemin", tha përfaqësuesja e Levica.

Fondi, nga ana e tij, njoftoi se nuk bëhet fjalë për ndërprerje të pagesave, por për një proces të vazhdueshëm të përpunimit dhe pagesës së rasteve në përputhje me rregullin dhe dinamikën e përcaktuar me ligj për kompletimin e tyre, ndërkohë që qytetarët vazhdojnë të raportojnë vonesa në pagesat monetare për pushimet për sëmundje dhe për leje lindjeje.

Foto: Printskrin nga konferenca për shtyp e Levica