Родители: „Со напади врз вештаците не се бришат документите“ — на судењето за пожарот во „Пулс“

Судењето за пожарот во кочанската дискотека „Пулс“, во кој загинаа 63 лица а над 200 беа повредени, продолжи со прашања одбраната до вештакот од Градежниот факултет.

Професорот Горан Марковски уште еднаш ги образложи наодите од вештачењето, нагласувајќи дека анализата покажува дека дискотеката не ги исполнувала потребните стандарди, регулативи и процедури.

Вештачењето и прашањето за одговорноста

Родителите на жртвите порачаа дека градежното вештачење е јасно, прецизно и аргументирано и дека отвора прашања од кои повеќе не смее да се бега — кој бил надлежен и зошто не постапил.

„За нас, родителите и семејствата на починатите деца особено е важно што вештачењето не се задржува само на состојбата на објектот, туку ги посочува и пропустите кај надлежните органи, оние кои имале законски надлежности и обврски да постапат. Токму тука е суштината, одбраната се обидува да го оспори вештачењето, но со напади врз вештаците не се бришат документите, фактите и утврдените пропусти“, изјави Александар Наунов, родител на жртва од пожарот во „Пулс“.

Семејствата нагласија дека извештајот не се задржува само на техничката состојба на објектот, туку јасно укажува на пропусти во постапувањето на државните органи и институции кои имале законска обврска да интервенираат. Тие оценија дека обидите на одбраната да ги поткопа вештачењата не го менуваат писмениот доказ и утврдените пропусти.

Судските рочишта во Кочани продолжуваат додека семејствата бараат појаснување и одговорност за утврдените пропусти.

Фото: прес-материјал од настанот