Русите ја погодија една од магацинските бази на СЗО во регионот на Киев

Еден од главните магацини на Светската здравствена организација (СЗО) за хуманитарна медицинска опрема во Украина беше погоден ноќеска за време на воздушен напад во регион близу Киев, соопшти агенцијата денеска.

„Пристапот до локацијата останува ограничен поради чадот и безбедносните проблеми, додека проценките за можна штета и губење на залихи се во тек. Ниеден вработен во СЗО не е засегнат“, изјави портпаролот на СЗО, Кристијан Линдмаер.

Овој напад доаѓа по инцидентот во август кога складиште на СЗО во јужниот град Дњепар беше погодено, што резултираше со губење на половина од медицинските залихи и опремата наменети за поддршка на околу 225.000 луѓе кои живеат на првите линии и во тешко достапните области.

Повикувања за заштита на хуманитарните објекти

Линдмаер рече дека друг магацин што го користеше СЗО во близина на Киев беше оштетен за време на голем бран напади врз главниот град и околината во јули, и дека ваквите инциденти сериозно влијаат на хуманитарните операции низ целата земја.

„Нападите се дел од поширок модел што влијае на хуманитарните операции низ целата земја. Во 2026 година, најмалку 20 напади погодија магацини за хуманитарна опрема, вклучувајќи 15 напади врз магацини во кои се наоѓала хуманитарна здравствена опрема“, изјави Линдмаер за новинарите во Женева.

СЗО соопшти дека по најновите инциденти веќе се идентификувани алтернативни аранжмани за складирање, додека продолжуваат проценките за можнота штета и загубените залихи.

Фото: прес-материјал од настанот