САД ги повлекоа бомбардерите Б-1 од базата Ферфорд
Пентагон: сите американски бомбардери од Ферфорд се вратени во матичните бази една недела по апсењата во близина на базата.
САД ги повлекоа своите бомбардери Б-1 од британската воздухопловна база Ферфорд во Глостершир и ги вратиле во матичните бази во САД, соопшти Пентагон една недела по апсењето на неколку лица под сомнение за подготовки на напади во близина на базата.
Повлекувањето следи по инцидентот на 27 септември
„Иако оперативната безбедност не ни дозволуваше во реално време да го потврдиме преместувањето на нашите сили и опрема, сега можеме да потврдиме дека сите американски бомбардери распоредени во ‘Ферфорд’ се вратија во своите матични бази во САД“, напишал портпаролот на Пентагон во електронска порака. Во соопштението не е наведена конкретна причина за повлекувањето.
Повлекувањето следува по инцидентот на 27 септември, кога полицијата беше известена за три сомнителни возила во близина на воздухопловната база. Првично беа уапсени петмина мажи под сомнение за терористички дела во близина на базата, а подоцна беа пуштени на слобода со кауција. Подоцна беше уапсен и шести маж, државјанин на Обединетото Кралство и Иран, кој исто така беше пуштен на слобода со кауција.
Извори од владата во Лондон не ја оспорија информацијата дека одлуката на Вашингтон била реакција на инцидентот во воздухопловната база во Глостершир. Од британска страна исто така беше наведено дека станува збор за воена, а не за политичка одлука, донесена на оперативно ниво и пренесена од американската војска до нејзините британски колеги.
Базата Ферфорд се користи како истурена оперативна локација од страна на Американското воено воздухопловство (USAF). Во последните месеци, од таму САД испраќаа бомбардери Б-1 и Б-52 кон Блискиот Исток откако Обединетото Кралство го одобри американското барање базата да се користи за одбранбени операции поврзани со Иран.
Во јули Иран изјави дека „секоја база што се користи за агресија врз иранска територија претставува легитимна цел за нашите сили“. Неколку дена по инцидентот, а пред апсењето на шестиот маж, американскиот сенатор Марко Рубио изјави за „Фокс њуз“ дека во случајот „јасно е вмешана странска страна“.
Фото: прес-материјал од настанот
