СДСМ: Мицкоски „под радарот“ договара бизниси за дата‑центри со употреба на вода и струја

Опозициската партија СДСМ денеска обвини дека премиерот Христијан Мицкоски "под радарот" договара комерцијални проекти за дата‑центри кои, како што велат од партијата, би ја користеле водата, струјата и земјата на државата без доволна јавна контрола.

Портпаролката на СДСМ, Богданка Кузеска, на прес‑конференција посочи дека идејата за национален дата‑центар наменет за државните институции не може да се меша со комерцијалните центри што, според партијата, Мицкоски ги договара со странски инвеститори.

"Што има заедничко националниот дата-центар за чување податоци на државните институции со комерцијалните дата-центри што Мицкоски ги договора за некој странски инвеститор, со огромна потрошувачка на струја и вода? Апсолутно ништо. Станува збор за две сосема различни работи", изјави Кузеска.

Сомнежи околу транспарентноста и трошоците

Кузеска рече дека партијата нема да трошат зборови за кредибилитетот на пратениците кои, како што ги опиша, ги бранија постапките на Мицкоски, и дека власта постапува нетранспарентно. "Мицкоски вели дека сè ќе биде транспарентно, а јавно признава дека преговара со пет-шест инвеститори. Со кого се договара Мицкоски ‘под радарот’ никој не знае. Имиња не се објавуваат. На кого Мицкоски му ги става на располагање водата, земјата и струјата на Македонија? Колку ќе ги чини тоа граѓните? Пари, вода, плодно земјиште? Граѓаните не знаат ништо. Мицкоски работи 'под радарот'", рече таа.

Од СДСМ тврдат дека ВМРО‑ДПМНЕ намерно ја манипулира јавноста за да ја прикрие вистинската цел: ставување државни ресурси во функција на приватни интереси и профити. "Ова е обид да се оправда нешто што нема никаква врска со европската агенда, туку со тендерски апетити. Зошто постојано мешаат јавни обврски со приватни дата-центри за инвеститори? За приватните инвестиции кои Мицкоски ги договара 'под радарот' да ги покријат со европската Реформска агенда која не ја исполнија", подвлече Кузеска.

Минатата недела лидерот на СДСМ, Венко Филипче, објави документ од компанија која според него покажува дека за изградба на дата‑центар веќе е обезбеден капацитет од 100 мегавати електрична енергија и директен пристап до реката Вардар. Филипче посочи дека документот е објавен пред три месеци и дека тоа, според него, е уште еден показател дека Владата работи под маса без да ја информира јавноста за проектите и нивното влијание врз ресурсите.

Премиерот Мицкоски ги одби обвинувањата како "тотална невистина", велејќи дека критиките доаѓаат од луѓе кои не ја сакаат Македонија да напредува. Тој потврди дека Владата преговара со пет‑шест потенцијални инвеститори, меѓу кои и „една голема мултинационална компанија“, и го бранеше планот за национален дата‑центар поддржан со грант и евтин заем од ЕУ, кој, според него, ќе се поврзе со веќе постоечкиот дата‑центар во Прилеп за зголемена заштита на податоците.

"Веќе имаме еден дата-центар во Прилеп, со поддршка од ЕУ ќе градиме и национален кој ќе ги поврзе сите институции", изјави Мицкоски.

Фото: СДСМ