СДСМ прашува зошто Мицкоски бара враќање на Ива Михаилова, а не екстрадиција на Груевски

Опозицијата СДСМ обвини дека премиерот Христијан Мицкоски и двајца министри се вмешани во, како што го нарекоа, пуштањето на Ива Михаилова во Бугарија и постави прашање зошто владата не го обновила барањето за екстрадиција на поранешниот премиер Никола Груевски.

„Скандалот со пуштањето на Ива Михаилова го откри договорот под радар, под маса направен во Софија.  Муцунски договори, Тошковски ја пушти, Мицкоски одобри, границата е швајцарско сирење, а одговорност нема. Сега Мицкоски се плетка сè повеќе во обид да го заташка скандалот“, изјави портпаролката на СДСМ, Богданка Кузеска.

Во соопштението од опозицијата се именуваат министерот за надворешни работи Тимчо Муцунски и министерот за внатрешни работи Панче Тошковски покрај премиерот Мицкоски, за наводното постапување во случајот со Михаилова. Таа, со македонско и со бугарско државјанство, на 12 октомври ја напуштила земјата заедно со својот адвокат и заминала во Бугарија, иако ѝ беа одземени личните документи како мерка на претпазливост во рамките на судењето во Кочани за сообраќајна несреќа со смртни последици.

Прашање за екстрадицијата на Груевски

Кузеска реагираше на најавата на Мицкоски дека случајот со Михаилова ќе го презентира пред НАТО и ЕУ и го посочи молчењето за Никола Груевски, кој избега во Унгарија по пресудата. „Зошто не се жали, зошто со истата гласност и не бара негово враќање од Унгарија? Ива е осомничена ама Груевски е осуден. Каде е најавеното ново барање за екстрадиција на Груевски? Во мај, пред 4 месеци, владата на Мицкоски најави дека кога ќе ги комплетира докуметните ќе поднесе ново барање. Патуваа документите со денови, се собираа документите, не оваа среда, следниот петок. Потоа велеа дека чекаат да се формира нова Влада во Унгарија. Поминаа 4 месеци, ново барање за екстрадиција на Груевски не е пратено. Уште една лага на Мицкоски. Вистината е дека тој го штити Груевски и не сака да бара екстрадиција. Времето потврдува дека Мицкоски сè што ќе каже – лаже. Криминалци штитат криминалци, тоа е суштината. А за Ива, пред да се жали за некој друг, Мицкоски мора да ги даде одговорите дома. Не 'кога тогаш' туку сега. Не да го штити Тошковски, не да ја заменува одговорноста. Правдата и законот мора да важи за сите подеднакво. Бандата треба да знае дека одговорност ќе има, сите до еден ќе одговараат“, рече Кузеска.

Според опозицијата, адвокатот на Михаилова не открил на кој премин ја поминале македонско‑бугарската граница. СДСМ побара конкретни одговори и побрза постапка за евентуално обновување на барањето за екстрадиција на Груевски, поради што, континуирано, според партијата, се губело време.

Премиерот Мицкоски пак изјави дека за случајот со Ива Михаилова ќе разговара со партнерите во НАТО и ЕУ оти „Бугарија може да стане прибежиште за криминалци“. Во меѓувреме СДСМ повторува дека правдата и законот мора да важат подеднакво за сите.

Фото: СДСМ