Се отстранува 25-годишен потпорен ѕид во градинката „Панорама“, ќе се гради нов долг 37,26 метри

Во дворот на градинката „Панорама“, која е клон на градинката „Кочо Раџин“, се отстранува стариот потпорен ѕид и на негово место се гради нова конструкција од армиран бетон.

Новиот ѕид ќе има должина од 37,26 метри и висина од 3,6 метри. Од Општина Центар посочуваат дека станува збор за ѕид стар 25 години, кој ќе биде заменет со конструкција со темели пошироки од претходните.

Вредност и рок

Општината тврди дека изградбата се изведува по сите важечки стандарди, со посебен акцент на квалитетот на материјалите и техничката изведба. Проектот е вреден 5.992.394 денари и ќе биде целосно завршен во рок од еден месец.

Градоначалникот Горан Герасимовски го поврза проектот со поголемата програма на вложувања пред почетокот на новата учебна година.

„И ова лето вложуваме во воспитно-образовната инфраструктура. Во моментов се работи и на поставување нова енергетски ефикасна фасада на училиштето „Кирил и Методиј“, следно е спортската сала во училиштето „Коле Неделковски" и „Гоце Делчев“, а во тек се и санации во ООУ „Димитар Миладинов“, рече градоначалникот.

Од Општина Центар додаваат дека продолжуваат со континуираниот процес на подобрување на инфраструктурата во училишта и градинки на својата територија.

Фото: Општина Центар