Се уште е запрена вакцинацијата со БСЖ на бебињата, непречено се одвива имунизацијата против сезонски грип

Вакцинацијата против сезонски грип се одвива непречено, додека имунизацијата со БСЖ на новороденчињата останува привремено запрена додека не пристигне нова пратка од Јапонија.

Досега се вакцинирани 1.722 лица од ризичните групи на население, а вакцинацијата се спроведува на 31 пункт низ државата. Пет пункта се во Скопје — во поликлиниките Идадија, Битпазар и Ѓорче Петров, во Центарот за јавно здравје — Скопје и во Институтот за јавно здравје.

Бесплатната вакцина против сезонски грип е наменета за лица над 65 години, лица со хронични заболувања, здравствени работници, бремени жени и деца на возраст од 6 месеци до 5 години.

Сомнеж за квалитетот на бугарските пратки; анализи се во тек

Министерството за здравство ја запре вакцинацијата со бугарските дози на БСЖ поради сомнежи за квалитетот. Во соработка со УНИЦЕФ се преговарало за набавка на јапонски вакцини; министерот Сашо Клековски очекува за 10-тина дена имунизацијата на новороденчињата да продолжи. Здравствените власти уверуваат дека одложувањето нема да му штети на најмалите.

Се прави анализа дали несаканите реакции на кои алармираше Хрватска се поврзани со бугарската вакцина или пак причината е друга. Во Хрватска првично беа пријавени четири случаи на можно воспаление на коските кај мали деца.

Производителот од Бугарија, „Бул Био“, соопшти дека кај две деца можеби била применета доза десетпати повисока од пропишаната. Компанијата ги отфрла тврдењата за проблеми со квалитетот на вакцината.

Фото: прес-материјал од настанот