Сергеј Попоски: Најголемиот триумф го доживеа истиот ден кога ја загуби мајката

Сергеј Попоски е 23-годишниот прилепчанец чиј интимен и моќен глас за кратко време се прослави на ТикТок и низ регионот, благодарение на видеа снимени во една гаража во Словенија кои собираат стотици илјади прегледи. Поради длабоката емоција и вокалниот распон, кај дел од публиката почнаа споредби со Тоше Проески.

Но, просторот на големата слава му беше придружен со трагедија: во јануари оваа година, тој освои престижниот „Grand Prix“ на фестивалот WAF Awards во Скопје — и токму тој ден доби известување дека неговата мајка трагично го загубила животот. „Ја подигнав наградата, а во истиот момент го изгубив најважното нешто“, вели Сергеј.

Тој ја опишува болката и недовербата кон тоа што се случило: "Тоа е навистина тешка приказна во мојот живот. Се сеќавам, резултатите се чекаа еден ден по мојот настап. Разговарав со мајка ми дента пред да загине, веднаш откако пеев. Нешто ми зборуваше дека треба да се вратам во Прилеп, бидејќи натпреварот беше во Скопје. Ама, ете… И точно кога ја подигнав наградата, во истиот момент ми се случи најстрашното нешто. Тоа ми го промени животот". Откако родителите му се развеле и тој живеел само со мајка си, нејзината смрт го остави сосема сам.

Песна и посвета

Попоски неодамна ја промовираше новата песна „Еднаш засекогаш“, снимена во Загреб. За време на промоцијата во Скопје и Загреб тој објасни дека песната носи порака за тоа како често ја чувствуваме вредноста на некој дури по неговата загуба. Тој работи и на авторски композиции, при што една од нив е директно посветена на неговата покојна мајка.

Музичкиот пат на Сергеј почна уште на пет години, кога неговиот дедо — класично образован музичар и диригент — го седнал зад пијаното и му ја всадил љубовта и дисциплината кон музиката. Тој студирал во музичкото училиште „Матрикс“ кај Денис Димоски и постигнал успеси на „Езерски бисери“, „Охрид Фест“, „Макфест“, а настапувал и во преполните „Крижанке“ во Љубљана како предгрупа на Жељко Бебек.

Денес, живеејќи и работeјќи меѓу Словенија и Хрватска, Сергеј вели дека Македонија му е секогаш во срцето и дека со гордост ја претставува каде и да настапи. За споредбите со Тоше тој скромно порача: „Тоше беше нешто неповторливо. Ако некој во мојот глас почувствува емоција што го потсетува на него, тоа за мене е огромен комплимент. Но, јас сум само 'дечко од гаража' кој сака да пее и кој сака да изгради сопствен пат".

Фото: прес-материјал од настанот