Сергеј Попоски од Прилеп: новата балканска сензација со голем настап во Загреб

23-годишниот пејач од Прилеп, Сергеј Попоски, го продолжува својот нагорен развој како нова балканска музичка сензација по неодамнашниот настап во Загреб што го привлече вниманието на јавноста и на деловни кругови.

Од гаражата до Градската кафана

Попоски беше специјален гостин‑изненадување на настанот International Business Meetup Club (IBMC), кој се одржа во познатата „Градска кафана“ во Загреб пред повеќе од 200 претприемачи, дипломати, инвеститори и личности од деловниот, културниот и спортскиот живот од Хрватска и странство.

Настанот го организираше хрватскиот бизнисмен Јосип Новосел (Dear Leader Joe), а младата македонска надеж ги остави присутните без зборови со својот моќен глас и непосредност на настапот. Тука, во Загреб, тој исто така ја промовираше својата нова песна и спот „Еднаш засекогаш“ (работена со Миро Буљан и Томислав Јовановиќ), која веќе добива регионално внимание.

Својата популарност Попоски ја почна преку едноставни акустични видеа снимени во гаража во Словенија: само пијано, микрофон и искрена емоција. Без милионски кампањи, неговите клипови на TikTok и на други социјални мрежи надминаа стотици илјади прегледи и му донесоа широка публика.

Поради длабоката емоција во вокалот, медиумите на Балканот го споредуваат со Тоше Проески, а некои го споменуваат и Јаков Јозиновиќ. Попоски со скромност одговара на тие споредби: „Тоше беше нешто неповторливо и никогаш не би рекол дека сум новиот Тоше. Но, ако некој во мојот глас или емоција почувствува нешто што го потсетува на него, за мене тоа е огромен комплимент. Сепак, јас сум само 'дечко од гаража' кој сака да пее и да изгради сопствен пат“ – скромно порачува Попоски.

Неговиот талент веќе го однесе и на поголеми сцени: настапи како предгрупа на легендарниот Жељко Бебек во преполните „Крижанке“ во Љубљана.

Зад успесите стои и една болна лична приказна. Во јануари оваа година Попоски го освои Grand Prix на меѓународниот фестивал WAF Awards во Скопје, но во истиот момент доби известување дека неговата мајка трагично го загубила животот. Тој за тој период откри: „Се сеќавам, разговарав со мајка ми дента пред да загине, веднаш откако пеев. Нешто ми зборуваше дека треба да се вратам во Прилеп… И точно кога ја подигнав наградата, во истиот момент ми се случи најстрашното нешто. Тоа ми го промени животот. Тешко е, но мислам дека сега ја носам нејзината енергија. Секој ден се борам и верувам во Господ“ – искрено откри Сергеј.

Музиката му почна уште од петгодишна возраст благодарение на неговиот дедо, класично образован музичар кој го вовел во светот на пијаното и пеењето. И покрај тешките удари, Попоски продолжува гордо да ја претставува Македонија на регионалните сцени.

Фото: прес-материјал од настанот