Gjashtë arrestime pas qëllimit me armë në një festë familjare në Dobridol
Ministria e Punëve të Brendshme: armë dhe municion të sekuestruar gjatë kontrolleve në Dobridol pas një videoje ku shfaqej qëllimi me armë në një festë.
Gjashtë persona janë arrestuar dhe një është thirrur për bisedë zyrtare pas publikimit të një videoje në rrjetet sociale ku shihet se në një festë familjare në fshatin Dobridol pranë Gostivarit është qëlluar me armë, njoftoi Ministria e Punëve të Brendshme pas kontrollimeve në disa lokacione.
Të gjitha kontrollimet janë kryer në Dobridol, ku autoritetet thonë se janë sekuestruar armë dhe municion. Rasti u hap pasi incizimi nga festa private u shpërnda online.
Sipas kronologjisë së ministrisë, në orën 18:00 është kryer kontroll tek I.S. (21), ndërsa pesë minuta më vonë është kontrolluar A.I. (30); gjatë këtyre veprimeve është gjetur dhe sekuestruar një pistoletë gazi. Paralelisht është kryer kontroll edhe te I.B. (25).
Në orën 18:15 policia kontrolloi banesën e B.A., ku u gjetën 30 fishekë për pistoletë gazi; në oborr u lokalizuan 27 gëzhoja të shpuara nga pistoleta e gazit dhe një fishek për armë gjuetie.
"B.A. (46) dhe i biri i tij M.A. (21) nga Dobridol janë privuar nga liria. Në orën 18:25 është kryer kontroll tek T.M. (26), gjatë të cilit janë gjetur dhe sekuestruar një pistoletë me tetë fishekë, një pushkë gjuetie me shtatë fishekë dhe një pistoletë gazi, pas së cilës ai është privuar nga liria, ndërsa S.M. është thirrur për një bisedë zyrtare," njoftoi Ministria e Punëve të Brendshme.
Policia bëri të ditur se pas dokumentimit të plotë të rastit do të ndërmerren padi të përshtatshme ndaj personave të përfshirë. Ministria gjithashtu publikoi incizimin e ngjarjes në rrjetet e saj sociale.
Foto: material shtypi nga ngjarja
